شەپۆلێکی بارانبارین و هەورەبروسکە سەرتاپای هەرێمی کوردستان دەگرێتەوە

وێستگەنیوز-

هەرێمی کوردستان لە درەنگانی ئەمشەوەوە دەکەوێتە ژێر کاریگەریی شەپۆلێکی نوێی بارانبارین و تەرزە و هەورەبروسکە، کە بە چەند قۆناغێک بەردەوام دەبێت و بەهۆیەوە پلەکانی گەرما بە رادەی 3 تا 4 پلەی سیلیزی دادەبەزن.

هەڤاڵ سدیق گەڵۆزی کەشناس دەڵێت، کەشی ناسەقامگیر لە درەنگانی ئەمشەوەوە لە سنووری ئیدارەی زاخۆ و پارێزگای دهۆکەوە بە نمەباران و بارانی مامناوەند دەست پێ دەکات، لە کاتەکانی خۆرهەڵاتن بۆ پێشنیوەڕۆی چوارشەممە، 28ــی تشرینی یەکەمی 2026، بارانبارینەکە دەگاتە پارێزگاکانی هەولێر، سلێمانی، کەرکووک، هەڵەبجە و ئیدارەکانی راپەڕین و سۆران و ناوچە شاخاوییەکانی دەوروبەریان.

رۆژانی پێنجشەممە و هەینی کاریگەریی شەپۆلەکە بەهۆی تێکەڵبوونی دوو نزمەپەستانی دەریای سوور و دەریای ناوەڕاست بەهێزتر دەبێت، بە تایبەتی رۆژی هەینی، 31ـی تشرینی یەکەمی 2026، ئەگەری تاوەبارانی بەخوڕ و بەلێزمە لە سەرتاسەری هەرێم هەیە، بەتایبەت لە ناوچەکانی باکوور و باکووری خۆرهەڵات.

هاوکات رۆژی هەینی خێرایی با ڕوو لە زیادبوون دەکات و لە نێوان 30 تا 40 کیلومەتر لە کاتژمێرێکدا دەبێت، و لەگەڵ بەردەوامیی شەپۆلەکەدا پلەکانی گەرما دابەزینی زیاتر بەخۆیانەوە دەبینن. هەروەها قۆناغی دووەمی بارانبارین لە سەرەتای مانگی یانزەدا دەست پێ دەکاتەوە و بڕی بارانبارین لە زۆربەی ناوچەکان باشتر دەبێت.

PM:08:57:27/10/2026

ئه‌م بابه‌ته 204 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت