شەپۆلێکی هەورەبرووسکەی بەهێز و بارانبارین هەرێم دەگرێتەوە

وێستگەنیوز-

شەپۆلێکی ناجێگیریی کەشوهەوا روو لە ناوچەکانی هەرێمی کوردستان و پارێزگای کەرکوک دەکات، کە هەورەبرووسکەی توند و بارانبارینی لەنێوان کەم بۆ مامناوەندی لەگەڵدا دەبێت و لە کاتەکانی شەودا کاریگەرییەکانی زیاتر دەردەکەون.

ئاراس جەبار، شارەزای کەشناسی لە راگەیەندراوێکدا بڵاویکردەوە، لە کاتەکانی دوای نیوەڕۆی ئەمڕۆ چوارشەممەوە لە سنووری پارێزگاکانی سلێمانی، هەڵەبجە و باکووری ئیدارەی گەرمیان هەورەبرووسکە دروست دەبێت و بارانێکی کەم دەبارێت، هاوکات لە کاتەکانی ئێوارە و شەودا دۆخی ناجێگیریی کەشوهەوا لە سنووری کەرکوک، سلێمانی، هەڵەبجە و باکووری گەرمیان زیاتر دەبێت و دەبێتە هۆی دروستبوونی هەورەبرووسکەی بەهێز و چڕ.

ئەو شارەزایەی کەشناسی روونیشیکردەوە، قەبارەی بارانەکە بە گشتی زۆر نابێت و بەپێی کات و ناوچەکان لەنێوان کەم بۆ مامناوەند دەمێنێتەوە، بەڵام برووسکەکان توند و بەهێز دەبن.

لە بەشێکی دیکەی پێشبینییەکانیدا ئاماژەی بەوە کردووە کە ناوچەکانی سنووری پارێزگای هەولێر، ئیدارەی سەربەخۆی سۆران و ئیدارەی راپەڕین بە هەمان شێوە ئەگەری دروستبوونی هەورەبرووسکە و بارینی تاوەبارانی لاوازیان لێدەکرێت.

PM:12:04:21/10/2026

ئه‌م بابه‌ته 204 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت