بارزانی جەخت لە پابەندبوون بە دەستووری عێراق و چارەسەری ئاشتییانەی دۆزی کورد دەکاتەوە

وێستگەنیوز-

مەسعود بارزانی، سەرۆکی پارتی، ئەمڕۆ سێشەممە لە دیدارێکدا لەگەڵ سەرۆکی فەخریی یەکێتیی نێودەوڵەتیی دیموکرات، جەختی لەسەر پێویستیی پابەندبوونی هەموو لایەنەکان بە دەستوور کردەوە بۆ بەدیهێنانی سەقامگیری و چارەسەرکردنی کێشەکان لە عێراقدا.

لە میانی پێشوازیکردنی لە لۆرد مایکل ئاشکرۆفت کەسایەتیی دیاری بەریتانی و سەرۆکی فەخریی یەکێتیی نێودەوڵەتیی دیموکرات، مەسعود بارزانی، کورتەیەکی لەسەر مێژووی خەبات و فەرهەنگی پێکەوەژیانی گەلی کوردستان خستەڕوو، هاوکات روونی کردەوە، چارەسەرکردنی دۆزی رەوای گەلی کوردستان دەبێت لە رێگەی گفتوگۆ و ئامرازی ئاشتییانەوە بێت.

لە بەرامبەردا، مایکل ئاشکرۆفت ئاماژەی بە هەنگاوەکانی گەشەپێدان و سەقامگیریی هەرێمی کوردستان کرد و رایگەیاند، پێویستە دۆزی کورد لە کۆڕ و کۆبوونەوە نێودەوڵەتییەکاندا باشتر بناسێندرێت، هەروەها ستایشی قوربانیدانی هێزەکانی پێشمەرگەی کوردستانی کرد لە شەڕی دژی چەکدارانی داع.ش.

PM:05:02:29/09/2026

ئه‌م بابه‌ته 100 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت