بەفەرمی یەکگرتنەوەی تەواوەتیی هێزەکانی پێشمەرگە و هەڵوەشاندنەوەی یەکە حزبییەکان راگەیەندرا

وێستگەنیوز-

ئەمڕۆ دووشەممە 21ی ئەیلوولی 2026، لە بارەگای سەرۆکایەتیی هەرێمی کوردستان لە هەولێر، لە رێوڕەسمێکی فەرمیدا بە ئامادەبوونی بەرپرسانی باڵای هەرێم و نوێنەرانی نێودەوڵەتی، پرۆسەی یەکگرتنەوەی تەواوەتیی هێزەکانی پێشمەرگەی کوردستان و هەڵوەشاندنەوەی فەرماندەیی یەکە حزبییەکان راگەیەندرا، کە وەک گەورەترین وەرچەرخانی سەربازی لە مێژووی هەرێمدا دادەنرێت.

رێوڕەسمەکە بە سەرپەرشتیی نێچیرڤان بارزانی سەرۆکی هەرێمی کوردستان و بە ئامادەبوونی مەسرور بارزانی سەرۆک وەزیران، قوباد تاڵەبانی جێگری سەرۆک وەزیران، شۆڕش ئیسماعیل وەزیری پێشمەرگە و فەرماندەی گشتیی هێزی پێشمەرگە بەڕێوەچوو. هاوکات نوێنەرانی هێزەکانی هاوپەیمانان و نوێنەری فەرمیی سەرۆک وەزیرانی عێراق بەشداربوون وەک پشتیوانییەک بۆ پرۆسەی بەدامەزراوەییکردن و بنیادنانی سوپایەکی نیشتمانیی یەکگرتوو.

لە رێوڕەسمەکەدا، وتەبێژی سەرۆکایەتیی هەرێمی کوردستان جەختی لەوە کردەوە کە لەمەودوا هیچ پێشمەرگەیەک لە دەرەوەی چوارچێوەی وەزارەتی پێشمەرگە نامێنێتەوە و سەرجەم هێزەکان لەژێر یەک چەتردا کار دەکەن.

ئەم راگەیاندنە لە کاتێکدایە کە لە 10ی ئەم مانگەدا، وەزیری پێشمەرگە کۆتاییهاتنی پرۆسەی یەکخستنەوەی هێزەکانی لەژێر چەتری وەزارەتدا راگەیاندبوو.

بەپێی پەیکەربەندییە نوێیەکە، تەواوی هێزەکانی یەکەی 70 و 80 لەسەر ئاستی یەک فەرماندەیی و کۆنتڕۆڵ کۆکراونەتەوە و لە چوارچێوەی 11 فیرقە، 2 هێزی گەورەی پشتیوانی، لەگەڵ لیوا و فەرماندەیی دەڤەرەکان رێکخراونەتەوە و بڕیارەکە چووەتە بواری جێبەجێکردنەوە.

AM:09:39:21/09/2026

ئه‌م بابه‌ته 172 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت