خوێندنی باڵا: لە ئێستاوە تا 24 کاتژمێری دیکە زانکۆلاین کارا دەکرێت

وێستگەنیوز-

وەزارەتی خوێندنی باڵا و توێژینەوەی زانستیی حکومەتی هەرێمی کوردستان ئاشکرای کرد، پرۆسەی وردبینیکردن لە داتا و نمرەکانی دەرچووانی پۆلی 12ی ئامادەیی لە قۆناغی کۆتاییدایە و چاوەڕوان دەکرێت لە چەند کاتژمێری داهاتوودا سیستەمی "زانکۆلاین" بە فەرمی بۆ پێشکەشکردنی داواکاری لە زانکۆ و پەیمانگەکان کارا بکرێت.

عەباس ئەکرەم، وتەبێژی وەزارەتی خوێندنی باڵا و توێژینەوەی زانستی لە لێدوانێکدا رایگەیاند: "پرۆسەی هەڵسەنگاندن و وردبینیکردن لە نمرەی دەرچووانی پۆلی 12ی ئامادەیی گەیشتووەتە وێستگەی کۆتایی؛ بە ئەگەری زۆرەوە ئەمڕۆ یان سبەی سیستەمی زانکۆلاین کارا دەکرێت تاوەکو دەرچووان بتوانن بەپێی ئارەزوو و کۆنمرەکانیان بەش و کۆلێژەکان لە زانکۆ و پەیمانگەکان دیاری بکەن."

هاوکات وتەبێژی وەزارەتی خوێندنی باڵا دڵنیایی دایە دەرچووان و کەسوکاریان کە سەرجەم ئامادەکاری و رێکارە پێویستەکان گیراونەتەبەر بۆ ئەوەی زۆرترین رێژەی قوتابیان لە زانکۆ و پەیمانگە حکومییەکاندا جێگەیان بۆ بکرێتەوە، جەختیشی لەوە کردەوە کە مافی هیچ قوتابییەک نافەوتێت.

PM:03:16:16/09/2026

ئه‌م بابه‌ته 124 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت