سەرکردەکانی هەرێمی کوردستان یادی مەولوودیان بەرز راگرت و پیرۆزبایی لە موسڵمانان دەکەن

وێستگەنیوز-

بەبۆنەی هاتنەوەی یادی لەدایکبوونی پێغەمبەری ئیسلام (د.خ)، سەرکردە باڵاکانی هەرێمی کوردستان پەیامی پیرۆزباییان ئاراستەی موسڵمانانی کوردستان، عێراق و جیهان کرد و جەختیان لە بەهاکانی لێبوردەیی و پێکەوەژیان کردەوە.

مەسعود بارزانی لە پەیامێکدا بەو بۆنەیەوە، گەرمترین پیرۆزبایی ئاراستەی موسڵمانان کرد و داوای لە خودای مەزن کرد کە ئەم یادە ببێتە دەرگای رەحمەت و بەرەکەت بۆ خەڵکی کوردستان و مرۆڤایەتی، هەروەها هیوای خواست ئاشتی و دادپەروەری لە ناوچەکە و جیهاندا بچەسپێت.

لای خۆشییەوە نێچیرڤان بارزانی، سەرۆکی هەرێمی کوردستان ئاماژەی بەوە کرد، کە ئەم یادە دەرفەتێکە بۆ نوێکردنەوەی پابەندبوون بە بەها باڵاکانی مرۆڤدۆستی و ئاشتیخوازی، هیوای خواست ببێتە هەوێنی پتەوکردنی گیانی برایەتی لەنێوان هەموو پێکهاتەکاندا.

هاوکات مەسرور بارزانی، سەرۆکی حکومەتی هەرێمی کوردستان وێڕای پیرۆزبایی، هیوای خواست یادی مەولوود ببێتە هۆی قووڵبوونەوەی زیاتری کولتووری بەیەکەوەژیانی ئاشتییانە لە کوردستان و پەرەپێدانی تەبایی لە نێوان سەرجەم گەلانی جیهاندا.

هەروەها بافڵ تاڵەبانی، سەرۆکی یەکێتیی نیشتمانیی کوردستان، پیرۆزبایی خۆی ئاراستەی موسڵمانان کرد و رایگەیاند، هیوادارە ئەم بۆنەیە ببێتە مایەی خێروخۆشی بۆ گەلەکەمان و هاندەر بێت بۆ زیندووکردنەوەی بەها بەرزەکانی ئاینی پیرۆزی ئیسلام.

یادی لەدایکبوونی پێغەمبەر (د.خ) کە ساڵانە لە 12ی رەبیعولئەوەلدا بەڕێوەدەچێت، لە هەرێمی کوردستاندا وەک بۆنەیەکی ئایینی و نیشتمانیی گرنگ سەیر دەکرێت و ئەمڕۆ 25ی ئابی 2026، لە تەواوی دامودەزگاکانی حکومەتدا پشووی فەرمییە.

AM:10:23:25/08/2026

ئه‌م بابه‌ته 364 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت