هەرێمی کوردستان یادی لەدایکبوونی پێغەمبەری ئیسلام (د.خ) پیرۆز دەکات

وێستگەنیوز-

ئەمڕۆ سێشەممە 25ی ئابی 2026، هاونیشتمانییان لە سەرتاسەری هەرێمی کوردستان یادی لەدایکبوونی پێغەمبەری ئیسلام (د.خ) بەرز رادەگرن، شارەکان بە ئاڵای رەنگاوڕەنگ و شیرینی بەخشینەوە رازێنراونەتەوە و بەو بۆنەیەشەوە لە تەواوی دامودەزگا حکومییەکان پشووی فەرمییە.

لە سەرلەبەیانی ئەمڕۆوە، کەرنەڤاڵە ئایینییەکان لە هەولێر و سلێمانی و شارەکانی دیکە دەستیان پێکردووە، لە ناوەندی شاری هەولێر و لە بەردەم قەڵا، بۆ پاراستنی سەلامەتی و رێکخستنی هاتووچۆ، لە کاتژمێر 8:00ی بەیانییەوە شەقامەکانی سەنتەری هەولێر بە رووی ئۆتۆمبێلدا داخراون و تیمە ئەمنی و تەندروستییەکان خراونەتە حاڵەتی ئامادەباشییەوە.

لە پارێزگای سلێمانیش، کاتژمێر 10:00ی بەیانی رێوڕەسمی سەرەکی لە مزگەوتی گەورە بە ئامادەبوونی بریکاری وەزیری ئەوقاف و ژمارەیەک لە لایەنە پەیوەندیدارەکان دەستپێدەکات، هاوکات تەکیەی کەسنەزانی و خانەقای سلێمانی بوونەتە شوێنی کۆبوونەوەی ئیمانداران بۆ ئەنجامدانی زیکر و نزا و خوێندنەوەی مەولوودنامە.

لە دهۆکیش هاوشێوەی شارەکانی دیکە، مزگەوتەکان بەتایبەت مزگەوتی حاجی عەبدوڵا سۆفی، بە خوانی تایبەت و دابەشکردنی شیرینی پێشوازی لە هاونیشتمانییان دەکەن.

بەڕێوەبەرایەتییەکانی ئەوقاف لە پارێزگاکان جەختیان لەسەر شکۆی یادەکە کردووەتەوە، عەباس خدر، بەڕێوەبەری ئەوقافی سلێمانی ئاماژەی بە هەماهەنگیی تەواو لەگەڵ یەکێتی زانایان کردووە.

لە هەمان کاتدا نەبەز ئیسماعیل، بەڕێوەبەری ئەوقافی هەولێر داوای لە خەڵک کردووە بەشداری ئەو کەرنەڤاڵە جەماوەرییە بن کە بۆ یادەکە رێکخراوە.

ئەم یادە کە هاوکاتە لەگەڵ 12ی رەبیعی ئەوەل، لە کوردستان تەنها بۆنەیەکی ئایینی نییە، بەڵکو بووەتە بەشێک لە کولتوور و هێمای پێکەوەژیان، کە تێیدا هەزاران کەس لە مزگەوت و تەکیە و شوێنە گشتییەکان کۆدەبنەوە بۆ بەرزڕاگرتنی سیمای روحیی ئەم رۆژە.

AM:08:42:25/08/2026

ئه‌م بابه‌ته 320 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت