هۆشدارییەک لە وەزارەتی داراییەوە: زانیارییەکانی دەرەوەی ئەم سەرچاوەیە لەسەر بانکی نیشتمان دوورن لە ڕاستییەوە

وێستگەنیوز -

راوێژکاری یاسایی و ڕاسپێردراوی وەزارەتی دارایی بۆ دامەزراندنی بانکی نیشتمان، ڕوونکردنەوەیەک لەبارەی بڵاوبوونەوەی زانیاریی ناڕاست لەسەر هەنگاوەکانی دامەزراندنی بانکەکە بڵاودەکاتەوە و ڕایگەیاند، هەر بەرەوپێشچوونێک هەبێت تەنیا لە ڕێگەی لاپەڕەی فەرمیی وەزارەتەوە بڵاودەکرێتەوە.

د. هاوڕێ کەمال، ڕاوێژکاری یاسایی و ڕاسپێردراوی وەزارەتی دارایی بۆ دامەزراندنی بانکی نیشتمان، لە ڕاگەیەندراوێکدا ئاماژەی بەوە کردووە، ماوەیەکە چەندین هەواڵ، لێدوان و بابەتی ڕۆژنامەوانی لەسەر هەنگاوەکانی دامەزراندنی بانکی نیشتمان و ئەو خزمەتگوزارییانەی لە داهاتوودا پێشکەشی دەکات بڵاو دەکرێتەوە، کە زۆر جار زیادەڕۆیی و ناڕاستییان تێدایە.


لە ڕاگەیەندراوەکەدا سێ خاڵی سەرەکی بۆ ڕای گشتی و میدیاکان ڕوون کراوەتەوە:

یەکەم: لە ئێستادا هەنگاوەکانی دامەزراندنی بانکی نیشتمان لە قۆناغی جێبەجێکردندان، پرۆسەی تاقیکردنەوە و چاوپێکەوتن بۆ دیاریکردنی بەڕێوەبەر، یاریدەدەری بەشەکان و فەرمانبەرانی بانکەکە بەڕێوەدەچێت.

دووەم: هەر زانیاری و بەرەوپێشچوونێک لەسەر قۆناغەکانی داهاتووی بانکەکە هەبێت، بەفەرمی لە لاپەڕەی تایبەتی وەزارەتی دارایی بڵاودەکرێتەوە.

سێیەم: هەر کەس، لایەن یان بەرپرسێک لە وەزارەتە جیاوازەکان لێدوان و شیکردنەوە لەسەر هەنگاوەکانی ئەو بانکە بدات، تەنیا گوزارشت لە ڕای تایبەتی خۆی دەکات و وەزارەتی دارایی بەرپرسیار نییە لێی.

PM:03:18:19/07/2026

ئه‌م بابه‌ته 784 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت