هەرێمی کوردستان و حکومەتی عێراق لەسەر ڕەشنووسێکی هاوبەشی تایبەت بە سیستمی ئەسیکۆدا رێککەوتن

وێستگەنیوز-

ئەمڕۆ پێنجشەممە 18ی حوزەیرانی 2026، شاندی ته‌كنیكی هه‌ولێر و به‌غدا کۆبوونەوە و گەیشتنە لێکتێگەیشتن و یاداشتێکی هاوبەشیان پەسەند کرد لەبارەی سیستمی ئەسیکۆدا، بڕیارە ڕەشنووسەکەی بۆ بڕیاری کۆتایی ئاراستەی ئەنجومەنی باڵای ئابووری عێراق و شاندی باڵای هەرێمی کوردستان بکرێت.

شاندەکەی هەرێمی کوردستان کە نوێنەرانی گومرگ، بازرگانی، باج، کشتوکاڵ و کوالێتی کۆنترۆڵی تێدابوو، توانییان هەنگاوێکی ئەرێنی بۆ چارەسەرکردنی خاڵە ناکۆکەکان بنێن.

سیستەمی ئەسیکۆدا (ASYCUDA) سیستمێکی پێشکەوتووی ئەلیکترۆنییە کە مامەڵەی کاغەز لە گومرگەکاندا ناهێڵێت و هەموو پرۆسەکانی وەرگرتنی ڕەسمی گومرگی و پشکنینی بارەکان بە شێوەی دیجیتاڵی ئەنجام دەدات، ئەم سیستمە ڕێگری لە خۆدزینەوە لە باج و گەندەڵی دەکات و داهاتەکان بە ڕوونی دەردەخات.

بە جێبەجێکردنی ئەم سیستمە لە دەروازەکانی وەک ئیبراهیم خەلیل، باشماخ و پەروێزخان، حکومەتی ناوەندی دەتوانێت لە ڕێگەی سێرڤەرە ناوەندییەکانەوە چاودێری وردی جموجۆڵی بازرگانی و داهاتەکان بکات.

بریارە رێککەوتنەکە لە کۆبوونەوەی داهاتووی ئەنجومەنی وەزاریی ئابووریی عێراق بە فەرمی پەسەند بکرێت، ناوەڕۆکی رێککەوتنەکەش لەبارەی ئەسیکۆدا بەمشێوەیەیە:

1- هەرێمی کوردستان دەسەڵاتی تەواوی دەبێت لە تۆمارکردنی کۆمپانیاکانی هەرێم لە سیستمی ئەسیکۆدادا.

2- راهێنان بە کارمەندانی دەروازەکانی هەرێمی کوردستان لەلایەن گومرگی فیدراڵییەوە دەکرێت.

3- رێککەوتنەکە پاڵپشت بە بڕگەی مادەکانی 110، 112، 114 و 121 بڕگەی سێ لە دەستوور واژۆ کراوە.

4- یەکخستنی پێناسەی گومرگی لە سەرجەم دەروازەکانی عێراق و هەرێمی کوردستان و هەر گۆڕانکارییەک بکرێت بە هاوبەشی دەبێت.

5- زمانی کوردی بۆ سیستمی ئەسیکۆدا زیاد دەکرێت.

6- کۆپی پارێزراوی سیستمەکە (باکئەپ) بۆ هەموو عێراق لە فەرمانگەی تەکنەلۆجیای زانیاریی هەرێمی کوردستان دەبێت.

7- داننان بە ناوچە گومرگییە ئازادەکانی هەردوو حکومەت.

8- سەرجەم بەڵگەنامەکانی دەستەی وەبەرهێنانی هەرێمی کوردستان تایبەت بە پرۆژەکان لە سیستەمی ئەسیکۆدا کاریان پێدەکرێت

9- سەبارەت بە بابەتی دەروازە نافەرمییەکان، لیژنەی هاوبەشی بۆ پێکدێت.

10- هیچ سانسۆرێک ناخرێتە سەر هیچ دەروازەیەک لە عێراق بەوانەی هەرێمیشەوە.

11- بابەتی داهاتی گومرگی و باج لە ئەنجومەنی ئابووریی عێراق یەکلا دەکرێتەوە.

12- رۆژژمێری کشتوکاڵیی یەکگرتوو پەیڕەو دەکرێت پاڵپشت بە رێککەوتنی هەردوو وەزارەتی کشتوکاڵ.

13- لێخۆشبوونی گومرگی و پاراستنی بەرهەمی ناوخۆ لە ئەنجومەنی ئابووری یەکلا دەکرێتەوە.

14- پشکنینی کۆنتڕۆڵی جۆریی کالای هاوردەکراو لەلایەن دەزگا پەیوەندیدارەکانی هەردوو حکوومەتەوە کاری پێ دەکرێت.

15- مۆڵەتی هاوردە و هەناردەی کاڵای دەرچوو لە حکوومەتی هەرێم کاری پێ دەکرێت.

16- بەڵگەنامەی کۆمپانیاکانی هەرێمی کوردستان، دەرچوو لە تۆماری کۆمپانیاکانی هەرێم پەسەندە.

PM:05:51:18/06/2026

ئه‌م بابه‌ته 312 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت