ئامادەکاریی بۆ بەرەوڕوبوونەوە لەگەڵ تای خوێنبەربوون دەکرێت
وێستگەنیوز-
بەڕێوەبەری گشتیی سامانی ئاژەڵ و ڤێتێرنەری لە وەزارەتی
کشتوکاڵ ئاشکرایدەکات کە ئامادەکارییەکان بۆ رووبەڕووبوونەوەی تای خوێنبەربوون چڕکراونەتەوە
و بۆ هەر پارێزگا و ئیدارەیەکی سەربەخۆ نزیکەی 100 ملیۆن دینار بۆ کڕینی دەرمان تەرخانکراوە.
رۆژی چوارشەممە، 13ی ئایاری 2026، رابەر محەمەد، بەڕێوەبەری
گشتیی سامانی ئاژەڵ و ڤێتێرنەری لە وەزارەتی کشتوکاڵ لە لیدوانێکی میدیاییدا راگەیاند،
"ئەم ساڵ حکومەتی هەرێمی کوردستان نزیکەی 100 ملیۆن دیناری بۆ هەر یەک لە ئیدارە
سەربەخۆکان و پارێزگاکانی هەرێمی کوردستان تەرخانکردووە بۆ کڕینی دەرمان. پارەکەش
راستەوخۆ دەدرێتە پارێزگاکان بۆ ئەوەی پرۆسەی کڕینی دەرمانەکان دوانەکەوێ."
لەبارەی شێوازی بەڕێوەچوونی پرۆسەکە، بەڕێوەبەری گشتیی
سامانی ئاژەڵ و ڤێتێرنەری گوتی: "بەشێکی شۆردن و دەرزی لێدانی ئاژەڵەکانمان لە
مانگی رابردووەوە دەستپێکردووە و بەردەوام دەبین تاوەکو هەموو ئاژەڵەکان دەشۆردرێن،
چونکە لەگەڵ بەرزبوونەوەی پلەی گەرما مەترسییەکانی بڵاوبوونەوەی تای خوێنبەربوون زیاتر
دەبێت."
بەڕێوەبەری گشتیی ڤێتێرنەری دڵنیایی دایە هاونیشتمانییان و
گوتی: "تاوەکو ئێستا هیچ تووشبوونێک لە هەرێمی کوردستان تۆمارنەکراوە، بەڵام
ئەم رێکارانە وەک ئامادەکاریی پێشوەختەن."
بە پێی ئامارەکان، پار 11 کەس لە هەرێمی کوردستان تووشی تای
خوێنبەربوون بوون: 3 کەس لە هەولێر، 2 لە سلێمانی و 6 کەس لە دهۆک کە 3ـیان گیانیان
لەدەستدا. هەروەها لە کەرکووکیش 5 کەس تووشی پەتاکە بوون و 4 کەسیان گیانیان لەدەستدا.
تای خوێنبەربوون نەخۆشییەکی ڤایرۆسیی هاوبەشە لەنێوان مرۆڤ
و ئاژەڵدا و لە رێگەی گەنە (قڕنە)وە بۆ ئاژەڵ دەگوازرێتەوە.
نیشانەکانی
نەخۆشیی تای خوێنبەربوون لە مرۆڤدا بەپێی پسپۆڕانی بوارەکە ئەمانەن: سەرئێشە و
ئازاری مل و سک، سووربوونەوەی چاو و سەر شان و سنگ، سکچوون و رشانەوە کە خوێنبەربوونی
لەگەڵ دەبێت.
AM:10:49:13/05/2026
ئهم بابهته 308
جار خوێنراوهتهوه
لێرەوە کۆمێنت بنوسە لە فەیسبوک دەردەکەوێت