ئەنەکەسە لەبارەی گرژییەکانی رۆژئاوای کوردستان هۆشداری دەدات
.jpeg)
وێستگەنیوز-
ئەنجومەنی نیشتمانیی کورد لە سوریا (ئەنەکەسە)، لە بەیاننامەیەکی بەپەلەدا کە ئەمڕۆ سێشەممە 20 کانونی دووەمی 2026 بڵاویکردەوە، نیگەرانیی قوڵی خۆی لە هەمبەر پەرەسەندنی مەترسیداری بارودۆخی سەربازی لە دەوروبەری شاری حەسەکە و ناوچە کوردییەکانی دیکە دەربڕی.
ئەنجومەنەکە هۆشداری دەدات کە ئەم جوڵە سەربازییانە هەڕەشە لە ئاسایشی مەدەنییەکان دەکەن و ناوچەکە بەرەو قۆناغێکی نوێی شەڕ و وێرانکاری دەبەن.
لە بەیاننامەکەدا هاتووە، سەپاندنی ئەمری واقیع بە هێزی چەک لە ناوچە کوردییەکان، تەنها دەبێتە هۆی فراوانبوونی بازنەی گرژییەکان و دروستکردنی ناڕەزایەتییەکی توندی جەماوەری، ئەمەش ئاشتیی کۆمەڵایەتی و سەقامگیریی ناوچەکە دەخاتە مەترسییەکی گەورەوە.
جەخت دەکاتەوە لەوەی لۆژیکی چەک ناتوانێت ببێتە جێگرەوەی چارەسەری سیاسی و هیچ ماف و ئاسایشێکی بەردەوامیش بۆ پێکهاتەکان دابین ناکات.
ئەنجومەنی نیشتمانیی کورد ڕایدەگەیەنێت، هەر جۆرە تێگەیشتن و ڕێککەوتنێک سەبارەت بە داهاتووی ناوچە کوردییەکان، نابێت تەنیا لە چوارچێوەی ئەمنی و سەربازیدا بێت، بەڵکو دەبێت لەسەر بنەمای پڕۆسەیەکی سیاسیی ڕوون بێت کە مافە نەتەوەییە ڕەواکانی گەلی کورد لە دەستووردا گەرەنتی بکات و شەراکەتێکی نەتەوەیی ڕاستەقینە لە سووریایەکی دیموکرات و فرەییدا بێتە کایەوە.
هەر لەم چوارچێوەیەدا، ئەنەکەسە داوای بەپەلە لە ویلایەتە یەکگرتووەکانی ئەمریکا، نەتەوە یەکگرتووەکان و کۆمەڵگەی نێودەوڵەتی دەکات کە بەرپرسیارێتیی ئەخلاقی و سیاسیی خۆیان هەڵبگرن بۆ ڕێگریکردن لە پەرەسەندنی زیاتری شەڕ، هەروەها داوا دەکات بە زووترین کات گەمارۆی سەر شاری کۆبانێ هەڵبگیرێت و ئاو و کارەبا بۆ دانیشتووانەکەی دابین بکرێتەوە، تاوەکو زەوینە بۆ گفتوگۆیەکی سیاسیی جدی بڕەخسێت کە ناوچەکە لە خوێنڕشتنی زیاتر بپارێزێت.
AM:02:26:20/01/2026
ئهم بابهته 96
جار خوێنراوهتهوه
لێرەوە کۆمێنت بنوسە لە فەیسبوک دەردەکەوێت