ئەمریکا بە پرۆژە یاسایەکی نوێ پشتیوانییەکانی بۆ هێزەکانی پێشمەرگە دووپاتدەکاتەوە

وێستگەنیوز-

پڕۆژە یاسایەکی فراوانی بەرگری و سیاسەتی دەرەوەی ئەمریکا مەرجی نوێ بۆ پێدانی بودجە بە هێزە ئەمنییەکانی عێراق دادەنێت، لە هەمان کاتدا گەرەنتیی بەهێز بۆ کورد لە باشوور و رۆژئاوای کوردستان دەستەبەر دەکات.

وەک ئەوەی میدیای رووداو بڵاویکردووەتەوە، ئەم پڕۆژە یاسایە ئەو وەشانەیە کە لەلایەن ئەنجومەنی نوێنەرانەوە پەسەندکراوە. وەشانێکی دیکە لەلایەن ئەنجومەنی پیرانەوە پەسەندکرابوو، بەڵام پێویستە جارێکی دیکە هەردوو ئەنجومەن بە هاوبەشی کۆببنەوە و پێکەوە دەنگ لەسەر وەشانێکی یەکگرتوو بدەن، دوای ئەوەش، پێویستە جارێکی دیکە وەشانە یەکگرتووەکە بە جیا لەلایەن هەردوو ئەنجومەنەکەوە پەسەند بکرێت و دیسان لە کۆبوونەوەیەکی هاوبەشدا وەشانی کۆتایی پەسەندبکەن بۆ ئەوەی بچێتە بەردەم سەرۆک و واژۆی لەسەر بکرێت.

بەپێی پرۆژە یاساکە بێت ئەو مەرجانەی ئەمریکا بۆ هاوکاری هێزە ئەمنییەکانی عێراق دایناوە ئەو بودجەیە ناگرێتەوە کە بۆ هێزی پێشمەرگە تەرخانکراوە.

لە پرۆژە یاساکەدا هاتووە، پێشمەرگە وەک "هاوبەشێکی ئاسایشی نیشتمانی" دەمێنێتەوە و نابێت بەهۆی ناکۆکییە سیاسییەکانی ناو عێراقەوە، بودجەکەی دوا بکەوێت یان بلۆک بکرێت.

لە هەمان کاتدا، بەڵگەنامەکە بەشێک لە هاوکارییەکانی ئەمریکا بۆ عێراق دەبەستێتەوە بەوەی بەغدا تاوەکو چەند دەتوانێت هەژموونی گرووپە چەکدارەکانی نزیک لە ئێران سنووردار بکات.

بۆ ئەوەی یارمەتیی ئەمریکای پێبدرێت، پێویستە بەغدا بیسەلمێنێت کە "جڵەوی چالاکییە نایاساییەکانی گرووپە چەکدارەکان دەکات"، دەسەڵاتی سەرۆک وەزیران بەسەر کەرتی ئەمنیدا بەهێز دەکات و لێپرسینەوە لەو گرووپانەی حەشدی شەعبی دەکات کە لە "پێشێلکاریی مافی مرۆڤ" یان هێرشکردنە سەر هاوپەیمانان تێوەگلاون.

ئەمریکا کۆتایی بە "مۆڵەتی بەکارهێنانی هێز" هێنا کە پەیوەست بوو بە جەنگی کەنداوی 1991 و هێرشکردنە سەر عێراق لە ساڵی 2002، واتە چیدیکە بۆ ئۆپەراسیۆنی سەربازی لە نێو عێراق، کار بەو یاسایە ناکرێت.

پڕۆژە یاساکە بڕگەی وردی لەسەر سوریا و رۆژئاوای کوردستان تێدایە و پێنتاگۆن پابەند دەکات بەوەی ساڵانە راپۆرتی ئاشکرا لەسەر هەزاران زیندانیی داعش بڵاوبکاتەوە کە لەژێر دەستی هەسەدەدان لە رۆژئاوای کوردستان و باکووری رۆژهەڵاتی سوریا.

بە گوێرەی پڕۆژە یاساکە، پێنتاگۆن دەبێت هەڵسەنگاندنی ورد بۆ دۆخی زیندانەکان، هەوڵە نێودەوڵەتییەکان بۆ ناردنەوەی زیندانییەکان و مەترسییە درێژخایەنەکانی زیندانەکان بدات، کە فەرماندە ئەمریکییەکان هۆشدارییان داوە ئەگەر چارەسەر نەکرێن، دەبنە خاڵی تەقینەوەی دۆخەکە.

هێزەکانی ئەمریکا لە سوریا رادەسپێردرێن کە بەردەوامبن لە پاڵپشتیکردنی هەسەدە وەک هاوبەشی سەرەکیی واشنتۆن دژی داعش و کارکردن لەگەڵ ئەنجومەنە خۆجێییەکان بۆ سەقامگیریی ئەو ناوچانەی لەژێر دەستی داعش دەرهێنراون.

پڕۆژە یاساکە بە روونی دەڵێت، "دەبێت هەسەدە بەشێک بێت لە هەر چوارچێوەیەکی سیاسیی داهاتووی سوریا"، ئەمریکا داوای حکومەتێکی گشتگیری سوری دەکات کە مافی پێکهاتەکان، بە کورد و ئەوانی دیکەوە بپارێزێت.

هەروەها دەسەڵاتی پێدانی هاوکارییەکانی ئەمریکا بۆ "گرووپە ئۆپۆزیسیۆنە پەسەندکراوەکانی سوریا" تاوەکو ساڵی 2026 درێژکرایەوە.

پرۆژە یاساکە کۆمەڵێک مەرخی تێدایە بۆ حکومەتی سوریا کە دەبێت جێبەجێیان بکات، لەوانە، "هاوکاریکردن لە بەرەنگاربوونەوەی تیرۆر، کۆتاییهێنان دوورخستنەوەی میلیشیا بیانییەکان لە دامەزراوەکانی دەوڵەت و جێبەجێکردنی ئەو رێککەوتنانەی لەگەڵ هەسەدە کراون (لەوانەش رێککەوتنی ئاداری 2025 کە هاوئاهەنگی سیاسی و ئەمنی لەنێوان بەرێوەبەرایەتیی خۆسەر و دیمەشق لەخۆدەگرێت)".

هەروەها پڕۆژە یاساکە یاسای قەیسەر بۆ پاراستنی سڤیلەکانی سوریا هەڵدەوەشێنێتەوە، کە لە ساڵی 2020ـەوە سەپێندرابووە سەر دیمەشق.

AM:10:26:08/12/2025

ئه‌م بابه‌ته 372 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت