چوارچێوه‌ی هه‌ماهه‌نگی بۆ هه‌ڵبژاردنی كاندیدی سه‌رۆك وه‌زیران كۆده‌بێته‌وه
وێستگه‌نیوز –
ئه‌مڕۆ یه‌كشه‌ممه 30ی تشرینی دووه‌می 2025 عامر ئه‌لفایز سه‌رۆكی هاوپه‌یمانی ته‌سمیم، ئاشكرای كرد كه چوارچێوه‌ی هه‌ماهه‌نگی سبه‌ی دووشه‌ممه كۆبوونه‌وه‌یه‌ك ئه‌نجام ده‌دات بۆ تاوتوێكردنی چه‌ند پرسێك له‌وانه هه‌ڵبژاردنی كاندیدی سه‌رۆك وه‌زیران.
ئه‌لفایز بۆ میدیا عێراقییه‌كان وتی: "كۆبوونه‌وه‌ی سبه‌ی چوارچێوه‌ی هه‌ماهه‌نگی كاندید بۆ پێكهێنانی حكومه‌ت یه‌كلایی ناكاته‌وه، به‌ڵكو باس له‌و بابه‌ته ده‌كات، جگه له چه‌ند بابه‌تێكی دیكه".
پێشبینیشی كردووه كه "چوارچێوه‌كه له ماوه‌ی دوو هه‌فته‌دا كاندیدی خۆی بۆ پۆستی سه‌رۆك وه‌زیران رابگه‌یه‌نێت دوای ئه‌وه‌ی ناوه‌كان له‌لایه‌ن ئه‌و لیژنه‌یه‌ی كه چوارچێوه‌ی هه‌ماهه‌نگی پێكیهێناوه، یه‌كلایی ده‌كرێنه‌وه".
پێشتر رادیۆی Monte Carloی نێوده‌وڵه‌تی له زاری سه‌رچاوه‌كانی له ناو دامه‌زراوه‌ی سیاسی شیعه‌دا بڵاویكرده‌وه كه "محه‌مه‌د شیاع سودانی سه‌رۆك وه‌زیرانی ئێستای عێراق كه بووه‌ته سه‌رۆك وه‌زیرانی كاربه‌ڕێكه‌ر، له سه‌رۆكایه‌تی حكومه‌تی داهاتووی عێراق دوورخراوه‌ته‌وه. بۆیه دیارترین كاندیده‌كان كه كێبڕكێ ده‌كه‌ن بۆ وه‌رگرتنی پۆستی سه‌رۆك وه‌زیرانی نوێی عێراق بریتین له نوری مالیكی سه‌رۆكی هاوپه‌یمانی ده‌وڵه‌تی یاس، عه‌بدولئه‌میر شممه‌ری وه‌زیری ناوخۆی ئێستا و حه‌مید شاتری به‌رپرسی ئێستای ده‌زگای هه‌واڵگری و قاسم ئه‌عره‌جی ڕاوێژكاری ئاسایشی نیشتمانی".
به‌گوێره‌ی زانیارییه‌كانی Monte Carlo، نوری مالیكی چانسی زۆره بۆ وه‌رگرتنی پۆستی سه‌رۆكی حكومه‌تی عێراق، ده‌شڵێت: "زانیاریی به‌رچاویش هه‌ن كه باس له‌وه ده‌كه‌ن كه ئه‌و به‌هره‌مه‌نده له پشتیوانیی فراكسیۆنه سوننه و كوردییه‌كان و وڵاتانی ناوچه‌یی و نێوده‌وڵه‌تی و پێیانوایه كه توانای چه‌كداماڵینی گرووپه چه‌كداره عێراقییه‌كانی هه‌یه".
ئه‌وه‌شی خستووه‌ته‌ڕوو كه ڕه‌نگه چانسی حه‌مید ئه‌لشه‌تری كه‌متر بن، به له‌به‌رچاوگرتنی ئه‌و خۆپارێزییه‌ی له ناو دامه‌زراوه‌ی سیاسی شیعه سه‌باره‌ت به په‌یوه‌ندییه نزیكه‌كانی له‌گه‌ڵ ئه‌حمه‌د ئه‌لشه‌رع سه‌رۆكی سوریا هه‌یه. له به‌رامبه‌ردا ئه‌عره‌جی و شممه‌ری چانسێكی باشتریان هه‌یه و به ڕكابه‌ری به‌هێز داده‌نرێن به‌رامبه‌ر نوری مالیكی.
PM:05:15:30/11/2025
ئه‌م بابه‌ته 824
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت