وەزارەتی ناوخۆی هەرێم: بەپێی یاسا مامەڵە لەگەڵ کەسانی ئاژاوەگێڕ دەکرێت و کەس لە سەرووی یاساوە نییە

وێستگەنیوز-

وەزارەتی ناوخۆی هەرێمی کوردستان، لە بارەی شەڕ و گرژییەکەی سەر رێگەی گوێڕ-هەولێر راگەیەندراوێکی بڵاوکردەوە.

وەزارەتی ناوخۆی حکومەتی هەرێمی کوردستان رایگەیاند، "ماوەیەکە لە لایەن چەند دەستێکی دەرەکی و بە فیتی هەندێک کەس و لایەنی ناوخۆیی، هەوڵی نانەوەی ئاژاوە دەدرێت".

ئاماژە بەوەکراوە، "نوێترین هەوڵی تێکدەرانە لە بە ئامانجگرتنی کێڵگەی گازی کۆرمۆر دەستی پێکرد، کە مەبەست لێی ڕاگرتنی بەرهەمهێنانی کارەبای هەرێم بووە، دوای ئەوەش حکومەتی هەرێمی کوردستان سوتەمەنیی شلی وەک جێگرەوەی گاز بۆ دابینکردنی کارەبا بەکار هێنا".

وەزارەتەکە دەڵێت، "بە هاندانی ناوخۆیی و دەرەکی، کۆمەڵە کەسێکی ئاژاوەگێڕ ڕێگەی تانکەرەکانی گواستنەوەی سوتەمەنی و هاووڵاتیاینیان لە سنووری گوێڕ گرت و تەقەیان بە سەر خەڵک و ڕێبوارانی ئەو ڕێگەیەدا کرد، لە ئەنجامی تەقەی ئەو کەسانەدا هاوڵاتییەک گیانی لە دەستدا ژمارەیەکی دیکەش بریندار بوون".

وەزارەتی ناوخۆ جەختی لەوە کردەوە، چیدیکە ڕێگە نادەن سوود لە نیازپاکیی دامودەزگاکانی هەرێمی کوردستان وەربگیرێت و سنوورێک بۆ ئەو کارە تێکدەرانە دادەندرێت.

دووپاتیشی کردەوە، بۆ راگرتنی ئەو جۆرە ئاژاوەگێڕییانە، بە پێی یاسا بەرکارەکان لە هەرێمی کوردستان مامەڵە لەگەڵ کەسانی ئاژاوەگێڕ دەکرێت و کەس لە سەرووی یاساوە نییە.

AM:09:20:30/11/2025

ئه‌م بابه‌ته 248 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت