هەڤاڵ ئەبوبەکر بۆ لایەنە سیاسییەکان: کوردستان یەکبخەن، دواتر خەمی یەکخستنی شوێنی تر بخۆن

وێستگەنیوز-

هەڤاڵ ئەبوبەکر، پارێزگاری سلێمانی پەیامێک ئاڕاستەی لایەنە سیاسییەکان دەکات و دەڵێت، "کوردستان؛ یەکبخەن، دواتر خەمی یەکخستنی شوێنی تر بخۆن".

هەڤاڵ ئەبوبەکر نووسیویەتی، "خەنجەرەکانتان لە پشتی یەک دەربێنن، دواتر دەستی میهرەبانیی و لێبوردەیی و هاوسۆزیی و هاوسەنگیی بۆ ئەوانی تر درێژبکەن، کوردستان یەکبخەن دواتر خەمی یەکخستنی شوێنی تر بخۆن".

پارێزگاری سلێمانی دەڵێت، "راپەڕینەکان؛ زۆرینەیەکی ناڕێکخراو دەیانکەن و سەریدەخەن، کەمینەیەکی رێکخراو دەستیبەسەردادەگرن، هەڵبژاردنەکان زۆرینەیەکی ناڕێکخراو بایکۆتی دەکەن و گۆڕانکارییەکان لە نیوەی رێگەدا دەوەستێنن، کەمینەیەکی رێکخراو بەشداریی دەکەن و سەرکەوتن بەدەستدێنن و ئەمری واقیع دەسەپێنن و دەماننگەڕێننەوە بۆ خاڵی سەرەتا".

دەشڵێت، "ئیرادەو ئامانج و هەوڵدان و هیممەت و کارکردن و کۆشش و خۆڕەتاندن و پابەندبوون و بەشداریی و بەردەوامیی و کۆڵنەدان و سوربوون و جەسوربوون و مکوڕبوون و شێرگیربوون و خۆبەبەرپرسیارکردن و داکۆکیکردن و ڕاستڕێکردن و ماندوونەبوون و هەڵنەهاتن و خۆنەخەساندن و خەمساردنەبوون و کەتەرخەمەینەکردن؛ بە ئامانجمان دەگەیەنن".

راشیگەیاندووە، "خۆزیا؛ لە بری ئەم هەموو حزب و لیستە، دوو بەرەی نیشتمانیی و دیموکراسیمان هەبووایە، توانای لە ئامێزگرتنی هەموو تەباو جیاوازو ناکۆکەکانیان هەبووایە، بۆ هاوڵاتییان بۆ کوردستان بۆ دادپەروەریی و حوکمی تیوارو ڕەواو ڕەند کاریان دەکرد، دەسەڵات (هێز، داهات، جوگرافیا)؛ دەسەڵاتی دەوڵەت بووایە، هاووڵاتیبوون و دەوڵەتی یاساو یاساسەروەریی بچەسپایە، نەک بنەماڵەو ماڵ و باڵ و مناڵ، ئەنجامی هەڵبژاردنێکی بێ غەلوغەش بێ زوڵموزۆر، یەکێکیانی بۆ ماوەی دیاریکراوی حوکمڕانیی دەبردە دامەزراوە دەوڵەتییەکانەوەو ئەوی تریان لە سەنگەری مەدەنیی ئۆپۆزسیۆنێکی کاراو بەهێزو بەدیلدا؛ بۆ ئەو ماوەیە دەکردە؛ چاودێرو فشارو دەسەڵاتی سێبەر".

هەڤاڵ ئەبوبەکر نووسیویەتی، "ئەزمونیی حوکمڕانیی و ئۆپۆزسیۆنمان وەک ڕەوانشاد نەوشیروان مستەفا لە کۆتاییەکانی ساڵی ١٩٩١دا فەرموی، گەشەیان دەکردو گەورەدەبوون، بۆ ئەم خواستە راستە، بۆ ئەم خەمە، هیچ دەمێک درەنگ نییە.

ئاماژەی بەوەشداوە، "بۆیە دەبێت بەشداربین لە پەیڕەوکردنی مافە سیاسییە کەسییە بنەڕەتییەکانماندا، تا گۆڕانکاریی ریشەیی وەک دەروازەی سەرەکیی دەربازبوون، بە مەرگ و نائومێدیی نەسپێرین، بۆئەوەی بۆیەکجار، شەرعیەتی دیموکراسیی بە شەرعییەتی دەستووریی بگۆڕین".

PM:05:21:22/10/2025

ئه‌م بابه‌ته 480 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت