وێستگەنیوز_
لە دووەم رۆژی بەشداریکردنی لە دیداری میری لە شاری هەولێر، قوباد تاڵەبانی، جێگری سەرۆک وەزیرانی هەرێمی کوردستان سەبارەت بە پەیوەندییەکانی نێوان هەولێر و بەغدا رایگەیاند، هەمیشە پەیوەندییەکان بەرزی و نزمی تێدا بووە، بەڵام ئێستا جۆرێک لە رێککەوتن و هەماهەنگی هەیە، لەوانەشە سبەی دۆخەکە بە جۆرێکی تر بێت، هەر بۆیە دەبێت قۆناغی مەزاجی بوون تێپەڕێنین و بگەرێینەوە بۆ پەیوەندی دامەزراوەیی، پەیوەندی نێوان وەزارەت بۆ وەزارەت، پەرلەمان بۆ پەرلەمان و دوورکەوینەوە لەم جۆرە پەیوەندییەی ئێستا کە هەر رۆژە و بڕیارێک بدرێت.
قوباد تاڵەبانی رایگەیاند، دەستەواژەی پەیوەندی هەولێر و بەغدا هەڵەیە، دەبێت پایتەختی هەرێمی کوردستان، نوێنەرایەتی هەموو کورد بکات و بەغداش تەمسیلی هەموو عێراق بکات. قوڵایی ستراتیجی هەرێمی کوردستان بەغدایە، من دڵخۆشم کە حیزبەکەی من (یەکێتی نیشتیمانی کوردستان) لەمە تێگەیشتووە، هەولێکی زۆری داوە تاکو پێگەی خۆی لە بەغدا بەهێز بکات، تاکو گفتوگۆکان لە بەرژەوەندی خەڵک لە بەغدا بکرێت نەک هەولێر و سلێمانی.
ئاماژەی بەوەشکرد، دەبێتە لێکتێءگەیشتنێک بچەسپێت لەناو دامەزراوە فیدراڵییەکان، کە عێراق وڵاتێکی فیدراڵییە و هەرێمی کوردستان قەوارەیەکی دەستوورییە. بەرپرسیارێتی خۆی هەیە کە لە چوارچێوەی دەستووردا بۆی دانراوە.، کێشەکە لەوەدا نییە تەنها دەستوور وەک خۆی جێبەجێ ناکرێت، بەڵکو زۆر یاسا و پرۆژەیاسا هەیە کە هێشتا جێبەجێ نەکراون، ئەم کەلێنانەش لە بەغدا دەبێت پڕ بکرێنەوە و دەبێت ئێمە بەیەکگرتوویی کار بکەین.
جێگری سەرۆک وەزیران باسی لەوە کرد، لە سەروبەندی بانگەشەی هەڵبژاردنی عێراقداین، سەیری وتاری لایەنە سیاسییەکان بکە و هەمووی ئاراستەی ئەوەیە کە 'لە بەغدا بەهێز بین'، چونکە پرسە گەورەکان لەوێ چارەسەر دەکرێت. ئێمە دڵخۆشین بە رێککەوتنی هەناردەکردنی نەوتی هەرێمی کوردستان، بەڵام ئەمە جێگیر نییە. عێراق یەک سەرچاوەی داهاتی هەیە کە نەوتە بەڵام یاسایەکی نییە ئەمەی پێ رێکبخات، بۆیە پێویستمان لە یاسای نەوت و گازە و لە زۆر کێشە رزگارمان ببێت، بەو یاسایە لە مەزاجی کەسیی دوور دەکەوینەوە.
وتیشی: هۆکار زۆرن بۆ جێبەجێ نەکردنی یاسای نەوت و گاز، لە 2007ـەوە چەندین جار رەشنووس هەبووە و جێبەجێ نەکراوە، سەرمان سپی کرد بەم بابەتەوە.. ناکرێت بەم شێوەیە بەردەوام بین، سەردەمی مام جەلال، پرسە سیاسیی و گرنگەکان لە بەغدا چارەسەر دەکران، لە دوای کۆچی دوایی مام، بؤشاییەکی زۆر دروستبوو. دەبێت ئیتر بە هێزێکی سیاسیی بەهێزی دەستووری، بچینەوە بەغدا. چونکە ئەم یاسایە بۆ بەسرە و ئەنبار و پارێزگاکانی دیکەش باش دەبێت و کۆمپانیاکانی نەوتیش ئاسانتر و دڵنیاتر دەتوانن کارەکانیان بکەن.
بە وتەی قوباد تاڵەبانی، دەبێت عێراق گرنگی زیاتر بە بواری کشتوکاڵ بدات، وەک ئێمە لە هەرێمی کوردستان کردوومانە، دەبێت گرنگی زیاتر بە بواری وزە بدات و دەستبکات بە هەمەجۆرکردنی داهاتەکانی.
"ئەم دڵەڕاوکێیەی هەیە سەبارەت بە مووچە دەبێت کۆتایی پێبێت، ئەم یارییە وڵاتەکەی هیلاک کردووە، لە هەرێم و بەغدا بپرسن ئایا لە ئاستی پەیوەندی یەکتر رازین؛ هەردوولا دەڵێن نا! ئێمە دەبێت ئەو قۆناغە تێبپەڕێنین، دەبێت بزانین عێراق بەرەو کوێ دەڕوات." قوباد تاڵەبانی وای وت.
لە بەشێکی دیکەی قسەکانیدا قوباد تاڵەبانی سەبارەت بە داواکاری زیادکردنی پارێزگا رایگەیاند، پێش ئەوەی بیر لە زیادکردنی پارێزگا بکەین لە عێراق و هەرێمی کوردستان، پێویستە دەسەڵاتەکان رێک بخەینەوە، بۆ نموونە هیچ سوودێکی نییە هەڵەبجە پارێزگا بن بەڵام دەسەڵاتی ئیداری و کارگێڕی نەبێت.. بۆیە ئەمە نابێت وابێت و پێویستە بە ووردی کار بکرێت بۆ رێکخستنەوەی تەواوی کارەکان و سیستمی لامەرکەزی ئیداری.
سەبارەت بە پارێزگای کەرکووکیش وتی: ئێمە خوێندکاری مام جەلالین، سیاسەتەکانی یەکێتی، لە سەرۆکەکەیەوە هەتا ئەندامان و کادرەکان ئەوەیە کە ئێمە بڕوامان بە دیدگای مام جەلال هەیە بۆ کەرکووک، کە دەبێت هەموو پێکهاتەکان پێگەیان هەبێت و خۆی بە خاوەنی بزانێت، لە ئێستا و لە داهاتووشدا بە تایبەت پێکهاتە رەسەنەکانی وەک کورد و تورکمان و عەرەبە رەسەنەکان.
لە کۆتاییشدا دووپاتی کردەوە، مێژوو سەلماندوویەتی هەتا یەکگرتوو بین، بەهێزترین، بۆ پرسە گرنگەکان و پێکهێنانی حکومەت پێویستە یەکگرتوو و یەک وتار بین.
PM:01:12:08/10/2025