شێروان دووبەردانی: بەغدا بە نیازە تا دوای هەڵبژاردن مووچەی مانگی 7 و 8 نەنێرێت
وێستگەنیوز_
شێروان دووبەردانی، ئەندامی پەرلەمانی عێراق رایگەیاند: بەغدا نیازی ئەوەی هەیە تا دوای هەڵبژاردنی مانگی تشرینی دووەم، هیچ مووچەیەکی دیکە بۆ هەرێمی کوردستان، نەنێرێت.
ئەمڕۆ یەکشەممە 31ـی 8ـی 2025، شێروان دووبەردانی، ئەندامی پەرلەمانی عێراق بە میدیای پارتی ڕاگەیاندووە: بەغدا بەردەوامە لەو سیاسەتەی بەرامبەر هەرێمی کوردستان پەیڕەوی دەکات، پرسی مووچەی کردووەتە بابەتێکی سیاسی.
ئاماژەی بەوەشکردووە: بەغدا 690 ملیار دیناری بۆ هەرێمی کوردستان ناردووە و 300 ملیار دینار ماوە، بە بیانووی ئەوەی هێشتا نووسراوی بانکی ناوەندی بۆ وەزارەتی دارایی نەهاتووە. وتیشی: سەبارەت بە 120 ملیار دینارەکەی هەرێمی کوردستان، بەغدا ڕۆژانە ئاستی داواکارییەکانی بەرامبەر حکومەتی هەرێمی کوردستان بەرز دەکاتەوە، ئەو فشارەش بۆ سەر کوردستان سوودی نییە، "فشاری سیاسی هەیە، هەندێ لەلایەنە کوردستانییەکان ڕۆڵیان لە دروستکردنی کێشەکە هەیە کە بەدەنگی مووچەخۆرانی هەرێمی کوردستان چونەتە بەغدا، ئەو لایەنە کوردیانە بونەتە پارێزەری بەغدا دژی شایستەکانی هەرێمی کوردستان".
ئاشکراشی کردووە: هەرێمی کوردستان مانگانە پێویستی بە 150 دینار هەیە بۆ وەزارەتەکانی و نەخۆشخانەکانی، ئەوانەی بەغدا لە هەرێمی کوردستانی داوای دەکات، نە لە دەستوور، نە لە هیچ یاسایەک ئاماژەی بۆ کراوە.
شێروان دووبەردانی دەشڵێت، "بڕگەی 21ـی یاسای بوودجەی عێراق زۆر بەڕوونی باسی داهاتەکانی نا نەوتی دەکات، باسی پارێزگاکانی عێراق دەکات نەوەک پارێزگاکانی هەرێمی کوردستان، ئێستا وەک بیانوو، وەزارەتی دارایی فیدراڵ داوای تەواوی داهاتی نانەوتی هەرێمی کوردستان دەکات، ئەوەش واتای ئەوەیە، مانگەکانی داهاتوو، بەغدا ئاستی داواکارییەکانی زۆر زیاتر بەرز دەکاتەوە لەپێناو ئەوەی موچەی مووچەخۆرانی هەرێمی کوردستان نەنێرێت، لە ئەمڕۆوە، بەغدا دەستی کردووە بەوەی، بیانووی نوێ بە هەرێمی کوردستان دەگرێت دواتر دەشڵێن: ناردنی مووچەی مانگی شەش لەلایەن بەغداوە، وەک نیشاندانی نیازپاکییە بۆ هەرێمی کوردستان، وا نیشان دەدات خێر بە هەرێمی کوردستان دەکات، نەوەک مافێکی دەستووری و یاسایی بە هەرێمی کوردستان بدات."
"حکومەتی عێراق بە پیلان دەیەوێت موچەی خەڵکی کوردستان دوا بخات تا هەڵبژاردن دێتە پێشەوە، بۆ ئەوەی دەنگی دەنگدەران بۆخۆی کۆبکاتەوە، بەڵام پێم وایە درێژ دەبێتەوە بۆ چەند هەفتەیەکی دیکە بە بیانووی جیاواز، بەپێی ئەوەی ئێمە لە بەغداین و ئاگادارین، حکومەتی عێراق دەیەوێت تا دوای هەڵبژاردن مووچەی مانگەکانی تەمووز و ئابی مووچەی مووچەخۆرانی هەرێمی کوردستان نەنێرێت."
لەبارەی کاریگەرییەکانی دەستوور و یاساش لە عێراق، شێروان دووبەردانی دووپاتی کردەوە، دەستوور و یاسا لە عێراق ڕۆڵی نییە، بەڵکو سەرکردە شیعەکان و هەندێ لایەنی سیاسی و چوارچێوەی هەماهەنگیی ڕۆڵی سەرەکییان هەیە، بۆیە پێویستە فشارێکی زۆر بخرێتە سەر بەغدا، پێویستیشە کورد بە هەموو لایەنەکان و فراکسیۆنە جیاوازەکان، هەڵوێستێکی یەکگرتوو نیشانی بەغدا بدەن لەپێناو داکۆکی لە مافەکانی مووچەخۆرانی هەرێمی کوردستان، چونکە مووچەخۆرانی کوردستان بوونەتە قوربانیی ئەو ململانێیەی بەغدا لەگەڵ هەولێری دەکات.
PM:03:11:31/08/2025
ئه‌م بابه‌ته 688
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت