حكومه‌تی هه‌رێم ته‌مه‌نی خانه‌نشینی دادوه‌رانی درێژكرده‌وه
وێستگه‌نیوز-
حكومه‌تی هه‌رێمی كوردستان له نوێترین بڕیاری دا ته‌مه‌نی خانه‌نشینبوونی دادوه‌ران و داواكارانی گشتی درێژكرده‌وه بۆ 65 ساڵ.
له نووسراوێكدا كه وێنه‌یه‌كی ده‌ست وێستگه كه‌وتووه، وه‌زاره‌تی دارایی و ئابووری حكومه‌تی هه‌رێمی كوردستان به ئیمزای ئاوات شێخ جه‌ناب وه‌زیری دارایی رێنمایی بۆ درێژكردنه‌وه‌ی ته‌مه‌نی خانه‌نشینیی دادوه‌ران و ئه‌ندامانی داواكاریی گشتی بۆ 65 ساڵی ده‌ركرد.
نووسراوه‌كه‌ی وه‌زاره‌تی دارایی له رۆژی 24ی ئابی 2025 ده‌رچووه و تیایدا هاتووه: "پاڵپشت به حوكمه‌كانی ماده‌ی 9 له یاسای خانه‌نشینیی یه‌كگرتووی ژماره 9ـی ساڵی 2014ـی هه‌مواركراو، یاسای ده‌سه‌ڵاتی دادوه‌ریی هه‌رێمی كوردستان – عێراق ژماره 23ـی ساڵی 2007 ماده‌ی 46 بڕگه‌ی (یه‌كه‌م و دووه‌م) و نووسراوی ئه‌نجوومه‌نی وه‌زیران ژماره 9154 له 27ـی ته‌ممووزی 2025 تایبه‌ت به خانه‌نشینیی دادوه‌ران و ئه‌ندامانی داواكاریی گشتی، بڕیاردرا به درێژكردنه‌وه‌ی ته‌مه‌نی خانه‌نشینی له هه‌رێمی كوردستان بۆ 65 ساڵ و له هیچ بارێكیشدا ماوه‌ی خزمه‌تیان بۆ درێژ ناكرێته‌وه".
رۆژی 22ـی تشرینی دووه‌می 2022 دادگای باڵای فیدراڵیی عێراق، حكومه‌تی هه‌رێمی به جێبه‌جێكردنی یاسای خانه‌نشینیی یه‌كگرتووی عێراق، ژماره 9ی ساڵی 2014 پابه‌ند كرد، به‌ڵام حكومه‌تی هه‌رێم تاوه‌كو ته‌مموزی 2024 جێبه‌جێی نه‌كرد.
له هه‌رێمی كوردستان زیاتر له 300 هه‌زار خانه‌نشین هه‌ن، كه 164 هه‌زاریان خانه‌نشینی شارستانین و 148 هه‌زاریشیان خانه‌نشینی سه‌ربازین.
PM:07:42:30/08/2025
ئه‌م بابه‌ته 464
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت