وەزارەتی بازرگانیی عێراق دوو رۆژ مۆڵەت بە هاوڵاتییان دەدات

وێستگەنیوز-

وەزارەتی بازرگانیی عێراق بۆ نوێکردنەوەی کارتی بەشەخۆراک دوو رۆژ مۆڵەت دەدات بە هاوڵاتییانی عێراق و هەرێمی کوردستان.

محەمەد حەنون، وتەبێژی وەزارەتی بازرگانیی عێراق بە میدیا عێراقییەکانی راگەیاند، "ژمارەی ئەو هاوڵاتییانەی داتای کارتی بەشەخۆراکی ئەلیکترۆنییان نوێکردووەتەوە گەیشتووەتە 37 ملیۆن هاوڵاتی لە ناوخۆی عێراق، هاوکات 1ی ئەیلول دوا وادەیە بۆ تەواوکردنی پرۆسەی نوێکردنەوەی کارتی بەشەخۆراک".

ئاماژەی بەوەکرد، "لەدوای ئەم وادەیە، هاوڵاتییان دەتوانن لەرێگەی ناوەندەکانی بەشەخۆراکەوە فۆڕمەکە پڕبکەنەوە، بەڵام بە پێدانی پارە".

وتەبێژی وەزارەتی بازرگانیی عێراق وتی، "رێژەی بەشداریکردن لە هەرێمی کوردستان گەیشتووەتە لە 85% بەمشێوەیە، لە هەولێر لە %87، سلێمانی لە %86، دهۆک لە %82، هەڵەبجە لە %89، بەمەش کۆی ئەو کەسانەی داتاکانیان لە هەرێم نوێکردووەتەوە زیاتر لە چوار ملیۆن و 601 هەزار هاوڵاتییە".

وتیشی، "لە ئەنجامی پڕکردنەوەی فۆڕمەکە دەرکەوتووە دوو ملیۆن و 750 هەزار هاوڵاتی بە هۆکاری جیاواز بەشە خۆراکەکانیان راگیراون".

ئاراس محەمەد ئەمین، بەڕێوەبەری پسوڵەی خۆراکی سلێمانی بە وێستگەنیوزی راگەیاند، "لە دوای تەواوبوونی وادەی پڕکردنەوەی فۆڕمی ئەلیکترۆنی بەشەخۆراک هاوڵاتییان بۆ پڕکردنەوەی فۆڕمەکە دەبێت بڕی 10 هەزار دینار بدەن، هەروەها هەزار دیناریشیان بۆ دروستکردنی قوتابخانە و نەخۆشخانە لێوەردەگیرێت".

AM:09:11:30/08/2025

ئه‌م بابه‌ته 1716 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت