وێستگەنیوز_
دوێنێ پێنجشەممە شاندی ئیمراڵی بۆ ماوەی سێ کاتژمێر لەگەڵ عەبدوڵڵا ئۆجەلان، رێبەری زیندانیکراوی پارتی کرێکارانی کوردستان (پەکەکە) کۆبوونەوەو ئەمڕۆ شاندەکە پەیامێکی نوێی ئۆجەلانی بڵاوکردەوە.
شاندی ئیمراڵی دەڵێت: لە پەیامەکەیدا عەبدوڵڵا ئۆجەلان هەڵسەنگاندنی گشتگیری لەسەر قۆناخەکانی پرۆسەی ئاشتی و کۆمەڵگەی دیموکراسی و ئەو خاڵەی کە گەیشتووین پێی، پێشکەش کرد و رایگەیاند، "کێشەکەی ئێمە وەک برینێکی قووڵ بووە کە پێویستی بە نەشتەرگەرییەکی تایبەت هەیە و بەو هەستیارییە پڕۆسەکەیان تائێستا بەڕێوە بردووە."
ئاماژەی بەوەشداوە کە، "ئامانجمان ئەوە بوو کە هەموو هەوڵێک بدەین بۆ کۆتاییهێنان بە پڕۆسەیەکی پڕ ئازار، هەتا نەشگەین بە کۆمەڵگەی دیموکراسی، ئاشتی و یەکگرتن، پرۆسەکە سەرناگرێت، لەسەر ئەم بنەمایە دەتوانرێت بە ئەنجام بگەیەنرێت و پێویستی بە قۆناخێکی نوێ هەیە کە تێیدا هەنگاوەکان بەپەلە لە هەموو رەهەندەکانەوە بنرێن."
هەروەها جەختی لەسەر هەڵبژاردەی خۆی کردووەتەوە کە "هەمیشە یەکگرتنێک بووە لەسەر بنەمای کۆماری دیموکراسی و کۆمەڵگەی دیموکراسی. تێگەیشتن و پێکەوە کارکردن بۆ ئەم جووڵە ستراتیژییە قازانجێکی زۆری بۆ هەموومان، بۆ هەموو تورکیا دەبێت."
لە بەشێکی دیکەی راگەیەندراوەکەدا شاندی ئیمراڵی باسی لەوە کردووە، ئۆجەلان "رەخنەی لەو شێوازە گرتووە کە هەندێک لە سیاسەتمەداران و رۆژنامەنووسان مامەڵە لەگەڵ ئەم هەڵبژاردەیەدا دەکەن، بەوەی کە بە شێوازێکی پشتگوێخستن زیان بە پڕۆسەکە دەگەیەنێت."
ئۆجەلان "دووبارە جەختی لەسەر باوەڕی گەورەی بە دۆستایەتی هەمیشەیی و ئاشتیی نێوان گەلان کردەوە." ئەمە کۆتا خاڵیی راگەیەندراوەکەیە.
AM:10:36:29/08/2025