ده‌سته‌ی مافی مرۆڤ: نیگه‌رانین له هێرشكردنه‌سه‌ر ئه‌و كه‌سانه‌ی له كاتی دادگایی شاسوار عه‌بدولواحید ئاماده‌بوون
وێستگه‌نیوز-
ده‌سته‌ی سه‌ربه‌خۆی مافی مرۆڤ له هه‌رێمی كوردستان رایگه‌یاند كه نیگه‌رانن له هێرشكردنه‌سه‌ر ئه‌و كه‌سانه‌ی له كاتی دادگایی شاسوار عه‌بدولواحید ئاماده‌بوون، وه‌ك ئه‌ندامانی په‌رله‌مانی نه‌وه‌ی نوێ ئاماژه‌یان پێداوه، ده‌شڵێت: "دژی هه‌موو جۆره پێشێلكاریه‌كین و به‌هه‌موو شێوه‌یه‌ك توندوتیژی ڕه‌ت ده‌كه‌ینه‌وه".
ده‌سته‌ی سه‌ربه‌خۆی مافی مرۆڤ له هه‌رێمی كوردستان له راگه‌یه‌ندراوێكدا ئاماژه‌ی به‌وه‌دا كه "رۆژی پێنجه‌شه‌ممه تیمێكی نووسینگه‌ی سلێمانی مافی مرۆڤ به‌شدارییان كرد له دانیشتنی دووه‌می دادگاییكردنی شاسوار عه‌بدولواحید سه‌رۆكی جوڵانه‌وه‌ی نه‌وه‌ی نوێ له‌دادگای تێهه‌ڵچونه‌وه‌ی ناوچه‌ی سلێمانی له‌دادگای كه‌تنی /4 كه به‌پێی مادده‌ی (431) له‌یاسای سزادانی عێراق تۆمه‌تباركراوه كه له‌لایه‌ن ئه‌ندامێكی پێشووی په‌رله‌مانی كوردستان به‌ناوی (ش.ن) سكاڵای له‌سه‌ر تۆمار كراوه".
"دانیشتنی دادگاییه‌كه له دادگای كه‌تنی (4)ی سلێمانی به‌ڕێوه‌چوو، دانیشتنه‌كه بۆ ماوه‌ی دوو كاتژمێرو نیوی خایاند، به ئاماده‌بوونی سه‌رۆكی دادگا و ئه‌ندامانی دادگا و ئه‌ندامی داواكاری گشتی و پارێزه‌ره‌كانی هه‌ردوولا و ژماره‌یه‌ك په‌رله‌مانتار و كه‌سوكاری تۆمه‌تبار" ده‌سته‌كه واده‌ڵێت.
ئاماژه‌شی به‌وه‌دا كه "وته‌كانی (6) شاهید له دۆسیه‌كه وه‌رگیرا كه سه‌رجه‌میان تۆمه‌ته‌كانی سه‌ر تۆمه‌تباركراویان ره‌تكرده‌وه و پاشان لائیحه‌ی یاسایی به‌رگری پارێزه‌ره‌كان پێشكه‌شی ده‌سته‌ی دادگا كراو، به‌هۆی یه‌كلایی نه‌بوونه‌وه‌ی دۆسیه‌كه و نه‌گه‌یشتن به‌بڕیاری حوكمی كۆتایی، دانیشتنه‌كه دواخرا بۆ رێكه‌وتی 2025/9/2".
له راگه‌یه‌ندراوه‌كه‌ی ده‌سته‌ی مافی مرۆڤ هاتووه كه "سه‌باره‌ت به‌ڕوودانی پێشێلكاری به‌گوێره‌ی ووته‌ی ئه‌ندامانی په‌رله‌مانی نه‌وه‌ی نوێ ئاماژه‌یان به‌وه‌داوه كه چه‌ند كه‌سێك به‌جلی مه‌ده‌نیه‌وه هێرشیان كردۆته سه‌ر ئه‌و خه‌ڵكه‌ی له‌وێ ئاماده‌بوون و توندوتیژی به‌كارهاتووه، ئێمه وه‌كو ده‌سته‌ی سه‌ربه‌خۆی مافی مرۆڤ رایده‌گه‌یه‌نین كه نیگه‌رانین له‌و كرداره و دژی هه‌موو جۆره پێشێلكاریه‌كین و به‌هه‌موو شێوه‌یه‌ك توندوتیژی ڕه‌ت ده‌كه‌ینه‌وه".
جه‌ختیشی له‌وه كردووه‌ته‌وه كه "ناكرێ له‌ناو حه‌ره‌می دادگا رێگه به‌و جۆره كارانه بدرێ و هیوادارین لایه‌نی په‌یوه‌ندیدار لێكۆڵینه‌وه له‌و بابه‌ته بكات و لای خۆشمانه‌وه چاودێری ده‌كه‌ین".
ده‌سته‌ی سه‌ربه‌خۆی مافی مرۆڤ له هه‌رێمی كوردستان راشیگه‌یاند كه "ئێمه له راگه‌یاندنه‌كان بینیمان باس له‌هه‌ندێ حاڵه‌تی تووندوتیژی ده‌كرێ به‌رامبه‌ر ئه‌و كه‌سانه‌ی بۆ دادبینی له‌وێ ئاماده‌بوونه بۆیه به‌دڵنیاییه‌وه به‌دواداچون ده‌كه‌ین و داواش ده‌كه‌ین به‌ڵگه‌كان پێشكه‌شمان بكرێ و ده‌سته به‌ئه‌ركی خۆی ده‌زانێ به‌دواداچوون ده‌كات".
PM:10:25:28/08/2025
ئه‌م بابه‌ته 444
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت