سەرۆک وەزیرانی پێشووی فەڵەستین: جیهان و ناوچەکە لەبەردەم گەردەلولێکی مەترسیداردان


وێستگەنیوز_

لە دووەم رۆژی کۆنفرانسی هاوپەيمانیی سۆسيال ديموکرات لە وڵاتانی عەرەبی، محەممەد شاتییە، سەرۆک وەزیرانی پێشووی فەڵەستین باسی لە بارودۆخی غەززە کرد و رایگەیاند، هەموو رۆژێک پۆلێک لە منداڵان دەکوژرێن و ئەمریکا پاڵپشتیی دارایی شەڕی غەززە دەکات.

محەممەد شاتییە، سەرۆک وەزیرانی پێشووی فەڵەستین باسی لە پلانەکانی سەر شاری غەززە کرد و داوای کرد، جیهان دەست لەناو دەستی یەک لەبەردەم ئیسرائیل بووەستێت، نەک بەرژەوەندییەکانی غەززە، بەڵکو بەرژەوەندییەکانی جیهان لە مەترسیدایە و گەردەلولی ئەو گرژییانە جیهانیش دەگرێتەوە.

وتیشی، " ئەمڕۆ دەبێت جیهان بەیەکەوە لەبەردەم ئیسرائیل بووەستێت نەک تەنیا بۆ بەرگریی لە بەها مرۆییەکان، بەڵکو بۆ بەرگریی کردن لە خۆی، ئەمڕۆ جیهان و ناوچەکە لەبەردەم گەردەلولێکدان، بەرگریی لە بەرژەوەندییەکانتان بکەن بەرۆحێکی برایانەوە، ئەوەی دەیەوێت دان بە فەڵەستین بنێت، وەک سزادانی ئیسرائیل، هەڵەیە، چونکە دان پێدانان بە فەڵەستین مافێکی رەوای خەڵکی فەڵەستینە، ئەوەی دەیەوێت سزای ئیسرائیل بدات با هەناردەی چەک رابگرێت، ئەوەی دەیەوێت سزای ئیسرائیل بدات بەرهەمەکانیان مەکڕێت، ئەوەی دەیەوێت سزای ئیسرائیل بدات، با لە نەتەوەیەکگرتووەکان دەری بکات".

ئاماژەی بەوەشکرد کە ئەو بریندار و برسییە لەبەردەم ئەواندا وەک چۆن خەڵکی غەززە پارچەیەک نان و تۆزێک ئاوی لەبەردەست نییە، هەموو رۆژێک پۆلێک لە منداڵان دەکوژرێن، رۆژنامەوانان لەرێگەی قەناسەکانەوە دەکوژرێن، مامۆستای زانکۆ بەبێ پێڵاو لە ریزی وەرگرتنی خۆراک وەستاوە.

دەشڵێت، میدیای جیهان بە کوێری وەستاوە، هاوبەشەکان چاویان لەبەردەم کوشتنی منداڵان کوێر دەبێت، ئیسرائیل بەبێ بەهای مرۆیی و بەبێ پابەندبوون بە یاسا نێودەوڵەتییەکان هەڵسوکەوت دەکات و کەس نییە بیوەستێنێت.

وتیشی: "ئیسرائیل دەوڵەتێکی داگیرکار و رەگەزپەرەستە و دەیەوێت بە زۆرەملێ نەتەوەیەک لە خاکەکەی دەربکات، دەبێت برسێتی رابگیرێت و هەر ئێستا هاریکارییەکان بچنە غەززە وەک چۆن سەرۆک کۆمار و بافڵ جەلال تاڵەبانیش لە وتارەکانیان لە کۆنفرانسەکە وتیان، ئەوەتا ئەمڕۆ ئیسرائیل لە سووریا و لوبنان و یەمەن بەناوی ئایینەوە خەڵک دەکوژێت و خاک دەدزێت کەسیش ناتوانێت رایبگرێت."


PM:12:36:28/08/2025


ئه‌م بابه‌ته 212 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت

هەواڵی پەیوەندیدار

زۆرترین خوێندراو