قوباد تاڵەبانی: هەرگیز کورد هەرەشە نییە بۆ سەر هیچ وڵاتێک
وێستگەنیوز_
قوباد تاڵەبانی، جێگری سەرۆکی حکومەتی هەرێمی کوردستان لە میانی پێشکەشکردنی وتارێک لە دووەم رۆژی کۆنفرانسی هاوپەیمانیی حیزبە سۆشیال دیموکراتەکانی وڵاتانی عەرەبی لە سلێمانی رایگەیاند، هەمیشە دۆسیەی کورد وەک هەرەشەیەک بۆ ناوچەکە و شوناسی ناوچەکە تەماشاکراوە، بەڵام ئێستا وڵاتان و خۆرهەڵاتی ناوەراست و جیهان گەیشتووەنەتە ئەو بڕوایەی کورد هەرەشە نییە لەسەر ناوچەکە. کورد دەرفەتێکە بۆ ئاشتی، پێکەوەژیان و بەرەو ئاشتی بوون.
جێگری سەرۆکی حکومەت لە وتارەکەیدا وتی: لە هەر کوێیەک کوردی لێبێت، دەبینیت هەوڵی گرنگ دەدەن لە پێناوی دیموکراسی. تەماشای سووریا بکەین، یاخود دوای چەندین دەیە لە شەڕ لە تورکیا، ئێستا کورد رۆڵی گرنگ دەبینێت لە پرۆسەی ئاشتی.
ئاماژەی بەوەشکرد، سەرباری ئەنفالکردنی زیاتر لە 200 هەزار کەس لە هەرێمی کوردستان و وێرانکردنی چەند هەزار گوند و ئەو هەموو نەهامەتییەی پێیدا تێپەڕیوە، دوای پرۆسەی ئازادکردنی عێراق، کورد رۆڵیكی گرنگی گێڕاوە لە فیدراڵیەت و دیموکراتی لە عێراقدا، مافی خۆمان چەسپاند لە رێگەی دەستوور و یاساوە.
"ئەو هەموو شەڕە راستە زەمینەیەکی سازاند و دۆزی ئێمەی چەسپاند لەسەر ئاستی نێودەوڵەتی و لەگەڵ هاوپەیمانەکاندا، بەڵام شەڕ نەبوو مافی پێداین، بەڵکو دەستوور و شەڕێکی سیاسی و یاسایی بوو کە ئەمڕۆ مافی کورد لە چوارچێوەی عێراقدا چەسپیوە". قوباد تاڵەبانی وای وت.
ئاماژەی بەوەشكرد، "دەستووری عێراق، سنووری هەرێمی کوردستان و دەسەڵاتی حکومەت و پەرلەمانی دەستنیشان کردووە، ئەو راستییەی ئەمڕۆ لە دەرئەنجامی خەبات و پرۆسەیەکی سیاسییە، من دەپرسم ئایا دوای تێپەڕاندنی ئەو هەموو یاسایەی ئەنجوومەنی نوێنەران، تەواو مافی کورد بە تەواوی وەرگیرا؟ پێم وایە وانییە و هێشتا ماوە. راستە چوارچێوەکە هەیە، بەڵام هێشتا کارکردنی ماوە و دیسانەوە ئەمە بە دیالۆگ چارەسەر دەکرێت".
لە بەشێکی دیکەی قسەکانیدا قوباد تاڵەبانی وتی: بە گەڕانەوە بۆ دەقی دەستوور تەواوی کێشەکان چارەسەر دەکرێن؛ خۆشبەختانە دوای هەولێكی زۆر بە تایبەت لە لایەن یەکێتی و سەرۆکی یەکێتی نیشتیمانی کوردستانەوە، دەتوانم بڵێم زۆر نزیکترین بەراورد بە ساڵانی رابردوو بۆ کۆتاییهێنان بەو كێشانەی لە نێوان حکومەتی هەرێمی کوردستان و بەغدا هەیە، ئێستاش کورد نوێنەرایەتی دۆزێک دەکات، کە هەموو ناوچەکە دەگرێتەوە. دۆزی کورد تەنها دابینکردنی مووچە نییە، ئەمە مافێکی دەستووری و ئیدارییە، بەداخەوە ئێستاش پرسی مووچە پرسێکە هەموو مانگێک دەبێت خەڵک چاوەرێی هەواڵی هاتنی مووچە بێت.
دووپاتیشی کردەوە کە، نابێت پرسە گەورەکەمان لەبیر بچێت، کە ئەویش چەسپاندنی دۆزی کورد و مافی خەڵکە لە چوارچێوەی عێراقێکی فیدراڵی.
هەروەها سەبارەت بە دووبارە کردنەوەی هەمان ئەزموونی هەرێمی کوردستان و حکومەتی کوردی، قوباد تاڵەبانی پرسی: ئایا ئەم ئەزموونەی هەرێمی کوردستان دەتوانین لە تورکیا سووریا سوودی لێ وەربگیرێت؟ من دەڵێم بڕوا ناکەم چونکە کورد لە هەر بەشێكی دیکەدا، تایبەتمەندی خۆی هەیە و پەیوەستە بەو وڵاتەی کە تێیدا دەژیت، هەر بۆیە کێشەی کورد چارەسەر نەبێت لە وڵاتانی دیکە، پرسی دیموکراسی لەو وڵاتانە پێشناکەوێت. کورد هەمیشە مرۆڤدۆست بووە و ویستویەتی لە رێگەی دیالۆگ کێشەکانی چارەسەر بکات. ئەمەشمان بۆ جیهان سەلماندووە.
لە کۆتایی قسەکانیشیدا رایگەیاند، "خەباتمان بەردەوامە بە هاوکاری هاوپەیمانە بەردەوامەکانمان و عێراقیش زیاتر بەرەو بە دامەزراوەیی بوون دەڕوات."
AM:11:58:28/08/2025
ئه‌م بابه‌ته 380
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت