بافڵ تاڵەبانی: تا دێت دەسەڵاتی تاکڕەوی بنەماکانی دیموکراسی لاواز دەکەن
وێستگەنیوز_
لە میانی پێشکەشکردنی وتارێک لە دووەم رۆژی کۆنفرانسی هاوپەیمانیی حیزبە سۆشیال دیموکراتەکانی وڵاتانی عەرەبی لە سلێمانی، بافڵ تاڵەبانی، سەرۆکی یەکێتی نیشتیمانی کوردستان رایگەیاند، "کاتێک دیموکراسی گەشەدەکات کە پێکەوە کار بکەین و دڵنیابینەوە کە ئازادی و شکۆ مافی هەموو کەسێکە".
بافڵ تاڵەبانی رایگەیاند، ئەم کۆنفرانسە دەرفەتێکە تا پەیوەندییەکانمان بەهێزتر بکەین و لەسەر ئاستی هەرێم بە دەنگێکی ڕوونتر قسە بکەین، چونکە رۆژهەڵاتی ناوەراست چەندین ئاڵەنگاری لەبەردەمدایە.
ئاماژەی بەوەشکرد، دەیان ملیۆن خەڵک بەدەست جەنگەوە دەناڵێنن، جێگەی شەرمە 2025ـە و باسی ئەمە دەکەین! تا دێت دەسەڵاتی تاکڕەوی بنەماکانی دیموکراسی لاواز دەکەن، تا دێت ئازار و موعاناتی سوریا و غەززە و یەمەن، لەمسەر تا ئەوپەڕی جیهان خەم و داخێکی گران لەسەر دڵمان دروست دەکەن. بە تایبەتی ئەو غەدرانەی لە فەڵەستین دەکرێن.
بە وتەی سەرۆکی یەکێتی نیشتیمانی کوردستان، "چۆن هەندێک وڵاتانی یەکێتی ئەوروپا و رۆژئاوا دەتوانن باسی مافی مرۆڤ و وانەی دیموکراسی بۆ ئێمە بکەن لە کاتێکدا رێگە دەدەن ئەم جۆرە تۆقاندنە لە فەڵەستین رووبدات؟"
باسی لەوەشکرد، "لە ناوەراستی ئەم ناسەقامگیریانەدا، خواستێک هەیە بۆ شتێکی باشتر. گەنجان داوای ئایندەیەکی باشتر دەکەن کوە دووربێت لە جەنگ و پڕبێت لە دادپەروەری. گۆرانکاری نەک تەنها پێویستە، بەڵکو هەمووان گۆرانکاری دەوێت، چەندین موعاناتمان بینیوە، بەڵام خەڵکەکەمان خۆڕاگر بووە، دەزانین باجی شەڕ چییە، بەڵام دەزانین خەڵاتی ئاشتی چییە، دەزانین مەترسییەکانی دابەشبوون چییە، بەڵام دەزانین هێز لە یەکێتیدایە. بە تایبەت لەم هەرێمەی ئێمەدا و ئەو بارانەی پێیدا تێپەڕیوین. هەرگیز بێ هیوا نابین لە بنیادنانی کۆمەڵگەیەکی دادپەروەر و ئاشتیخواز."
AM:10:57:28/08/2025
ئه‌م بابه‌ته 828
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت