سەرچاوەیەک: 120 ملیار دینار داهاتی نانەوتی بۆ بەغدا نێردرا
وێستگەنیوز_
پاش ئەوەی رۆژی 26ـی 8ـی 2025، کۆبوونەوەی ئەنجوومەنی وەزیرانی عێراق بەڕێوەچوو و لە کۆبوونەوەکەدا بڕیار درا، مووچەی مانگی حوزەیرانی مووچەخۆرانی هەرێمی کوردستان خەرج بکرێت، ئەمڕۆ وەزارەتی دارایی رایگەیاند، "رێکارەکانی ناردنی 120 ملیار دینار داهاتی نانەوتی هەرێمی کوردستان تەواو بوون و ئەمڕۆ خراوەتە سەر هەژماری وەزارەتی دارایی فیدراڵ."
ئەمڕۆ پێنجشەممە، 28ـی ئابی 2025، سەرچاوەیەک لە وەزارەتی دارایی هەرێمی کوردستان رایگەیاند، "دوێنێ دەستمان بە رێکارەکانی ناردنی داهاتی نانەوتی کرد بۆ عێراق، بەڵام ئەمڕۆ رێکارەکان تەواو بوون و پارەکە خراوەتە سەر هەژماری وەزارەتی دارایی فیدراڵ لە لقی هەولێری بانکی ناوەندیی عێراق".
ئاماژەی بەوەش دا، هەرێمی کوردستان هەموو پابەندییەکانی خۆی بەرامبەر بەغدا جێبەجێ کردووە، ئێستا ماوەتەوە بەغدا بەپێی رێککەوتن مووچەی مانگی حوزەیرانی مووچەخۆرانی هەرێمی کوردستان بنێرێت.
کۆتا جار 24ـی تەممووز بوو کە مووچەی مانگی ئایار نێردرا، بەو پێیە لە ماوەی چوار مانگا فەرمانبەران و مووچەخۆران تەنها یەک مووچەیان وەرگرتووە؛ لە کاتێکدا لە عێراق دابەشکردنی مووچەی مانگی ئاب دەستیپێکردووە.
AM:09:02:28/08/2025
ئه‌م بابه‌ته 844
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت