ئاوات شێخ جەنگی باسی رووداوەکەی لالەزار دەکات و دەلێت: کاتی شەڕەکە وەک رۆژی حەشر وابوو

وێستگەنیوز-

ئاوات شێخ جەنگی، خوشکی لاهور شێخ جەنگی لەمیانەی چاوپێکەوتنێکدا لە درەو میدیا باسی لە شەڕەکەی لالەزار کرد کە لە بەرەبەیانی رۆژی 22ی ئەم مانگە روویدا.

ئاوات شێخ جەنگی رایگەیاند، "لاهور و پۆڵاد هەوڵیاندا بە زۆر من بنێرنەوە لە لالەزار نەبم، بەڵام من هەر نەڕۆشتم، پێش رووداوەکە ژینۆ محەمەد و فێنک ئەحمەد هاتن بۆ لالەزار".

ئاماژەی بەوەکرد، "پێش رووداوەکە بافڵ تاڵەبانی و لاهور شێخ جەنگی بە تەلەفۆن قسەیان دەکرد، بافڵ بە توڕەییەوە بە لاهوری دەوت خۆت تەسلیم بکە، دووبارە لە کاتژمێر 3:00 بافڵ تاڵەبانی تەلەفۆنی بۆ لاهور شێخ جەنگی کردەوە و داوایکرد خۆی تەسلیم بکات".

ئاوات شێخ جەنگی وتی، "پێش رووداوەکە دەموت بافڵ هەرگیز کاری واناکات"، وتیشی، "پێش ئەوەی هێزە ئەمنییەکان تەقە بکەن، لاهور داوای لە هێزەکەی دەکرد یەک کەس تەقە نەکات".

ئەوەشی خستەڕوو، "هەر لەگەڵ دەستپێکردنی شەڕ و تەقە درۆن و تۆپ هات، دەوت رۆژی حەشرە، بەڵام لەگەڵ دەستپێکردنی شەڕەکە رێبوار حامی حاجی غالیم نەدی، هەروەها کاتێک پۆڵاد-یان هێنایە خوارەوە بینم قاچی بریندارە".

راشیگەیاند، "کاتێک ئاگر کەوتەوە، تەلەفۆنم بۆ بەرگریی شارستانی کرد و تیمیان نارد، بەڵام رێگەیان پێ نەدان"، ئاماژەی بەوەشدا، "هێزەکەی لالەزار لەنیوەی شەڕەکە فیشەک و پێدوایستییەکی شەڕی پێنەمابوو".

وەک ئاوات شێخ جەنگی گێڕایەوە، "هەر هاوارم دەکرد بافڵ شەڕەکە رابگرێت، چونکە بافڵم زۆر خۆشدەویست، ئەویش بۆ من وابوو، بەڵام دوای ئەوە بافڵ وەڵامی نەدامەوە هاوارم بۆ وەهاب کرد، وەهاب وەڵامی دامەوە و وتی کوان، وەهاب خۆی لاهوری هێنایە دەرەوە".

باسی لەوەکرد، "لاهور و پۆڵاد برانە ڤانێکەوە منیش چوومە هەمان ڤانەوە، داوام کرد پۆڵاد ببرێتە نەخۆشخانە، چونکە خوێنێکی زۆری لێ رۆشتبوو، کاتێک پۆڵادیان بردە ناو ئەمبوڵانسەکە لاهور هەڵبژارد، بەلام لاهور منی نارد بۆلای پۆڵاد وتی، لەگەڵ پۆڵاد بڕۆ".

ئاوات شێخ جەنگی باسی لە هەشتی تەموز کرد و وتی، "دوای هەشتی تەموزیش چوومە لای بافڵ هات بە پیرمەوە و ماچم کرد و وتم دەچم کێشەکە حل دەکەم، بەڵام بافڵ قەناعەتی نەدەکرد هەر دەیوت دەرمانخوارد کراوم".

ئاوات شێخ جەنگی لە کۆتایی قسەکانیدا رایگەیاند، "ئەوەی ئێمە ئەو رۆژە لە لالەزار بینمان، یارەبی کەس نەیبینێت".

AM:12:01:28/08/2025

ئه‌م بابه‌ته 13944 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت