هەواڵی کۆبوونەوەی ترەمپ و مەسرور بارزانی راست نییە

وێستگەنیوز-

لەبارەی سەردانی مەسرور بارزانی، سەرۆکی حکومەتی هەرێمی کوردستان بۆ ئەمریکا و کۆبوونەوەی لەگەڵ دۆناڵد ترەمپ، سەرۆکی ئەو وڵاتە وێستگەنیوز بەدواداچوونی کرد، دەرکەوت مەسرور بارزانی سەردانی ئەمەریکای کردووە، بەڵام هەواڵی کۆبوونەوەی لەگەڵ سەرۆکی ئەمریکا دوورە لەڕاستییەوە.

چەند میدیایەکی سەر بە بزووتنەوەی گۆڕان باڵی کوردسات لەنێویاندا "knn" لە میانەی راپۆرتێکدا بڵاویانکردووەتەوە، مەسرور بارزانی، سەرۆکی حکومەتی هەرێمی کوردستان شەوی پێنجشەممە لەسەر هەینی سەردانی ئەمریکای کردووە بە مەبەستی کۆبوونەوە لەگەڵ سەرۆکی ئەو وڵاتە دوور لە چاوی میدیاکان.

بەپێی راپۆرتەکەی میدیای کەی ئێن ئێن بێت، لەلایەن سەفین دزەیی، بەرپرسی پەیوەندییەکانی دەرەوەی هەرێم و بەیان سامی عەبدولڕەحمان، راوێژکاری سەرۆکی حکومەت ئامادەسازی کراوە بۆ کۆبوونەوەی مەسرور بارزانی لەگەڵ ترەمپ، مەبەستی کۆبوونەوەکەش بۆ پرسی مووچە و نەوتی هەرێم و پرسی حەشدی شەعبی بووە.

بەپێی بەدواداچوونەکانی وێستگەنیوز لە کارنامەی کۆشکی سپی لەو رێکەوتەی باس کراوە بەهیچ جۆرێک کۆبوونەوەی مەسرور بارزانی و ترەمپی تیادا نییە.

هەروەها وێستگەنیوز لە چات "جی پی تی" پرسی لەوبارەیەوە، لە وەڵامدا ئاماژەی بەوەدا کە هیچ کۆبوونەوەی لەو جۆرە نەبووە و کۆبوونەوەش نەکراوە لەنێوان مەسرور بارزانی و دۆناڵد ترەمپ.

بۆ پشتڕاستکردنەوەی زیاتری هەواڵەکە وێستگەنیوز، پەیوەندیی بە چەند بەرپرسێکی ئەنجومەنی وەزیرانی هەرێمی کوردستانەوە کرد و رەتیانکردەوە مەسرور بارزانی لەگەڵ دۆناڵد ترەمپ کۆبووبێتەوە.

PM:02:43:08/08/2025

ئه‌م بابه‌ته 2020 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت