ده‌زگای ئاسایش: تۆمه‌تبارێكی فێڵ و جادوو ده‌ستگیر كرا
وێستگه‌نیوز-
ده‌زگای ئاسایشی هه‌رێم رایگه‌یاند كه تۆمه‌تبارێكی خراپ به‌كارهێنانی ئامێره‌كانی په‌یوه‌ندیكردنی ده‌ستگیركرد، كه هه‌ڕه‌شه‌ی له 50 ئافره‌ت و پیاو كردبوو.
ئه‌مڕۆ دووشه‌ممه 4ی ئابی 2025، ده‌زگای ئاسایش له راگه‌یه‌ندراوێكدا ئاماژه‌ی به‌وه‌دا كه "رۆژی 2025/7/17 له‌سه‌ر سكاڵای هاوڵاتیان، به‌دواداچوون و كۆكردنه‌وه‌ی زانیاری وورد، له‌سه‌ر چه‌ند ئه‌كاونتێكی تۆڕه كۆمه‌ڵایه‌تییه‌كان كرا كه به‌ناوی سیحر و جادووكردن پاره‌ی له‌چه‌ندین هاوڵاتی وه‌رگرتووه و دواتریش هه‌ڕه‌شه‌ی بڵاوكردنه‌وه‌ی وێنه و ڤیدیۆی له‌ئافره‌ته‌كان كردبوو".
له راگه‌یه‌ندراوه‌كه‌دا هاتووه كه "به‌ڕێوه‌به‌رایه‌تی ئاسایشی راپه‌ڕین، له‌سه‌ر فه‌رمانی دادوه‌ری دادگای لێكۆڵینه‌وه‌ی ئاسایش، توانییان شوێنی تۆمه‌تبار ده‌ستنیشان بكه‌ن و له‌چالاكییه‌كه‌دا تۆمه‌تبارێك ده‌ستگیر بكه‌ن".
ئاسایش ده‌ڵێت: "تۆمه‌تبار ماوه‌ی دووساڵه به‌ناوی سیحر و جادوو، به‌مه‌به‌ستی به‌ده‌ستهێنانی پاره هه‌ڕه‌شه‌ی له‌چه‌ندین ئافره‌ت و پیاو كردووه".
ئه‌وه‌شی خسته‌ڕوو كه "تۆمه‌تبار ته‌مه‌نی 25 ساڵه، دوای ده‌ستگیركردنی له‌لایه‌ن به‌ڕێوه‌به‌رایه‌تی ئاسایشی راپه‌ڕین ده‌ستبه‌سه‌ر سه‌رجه‌م ئه‌كاونت و به‌ڵگه وێنه و ڤیدیۆكانی گیرا".
ده‌زگای ئاسایش راشیگه‌یاند كه له‌ئێستادا تۆمه‌تبار به‌مادده‌ی 2 له‌یاسای قه‌ده‌غه‌كردنی خراپ به‌كارهێنانی ئامێره‌كانی په‌یوه‌ندیكردن راگیراوه و لێكۆڵینه‌وه له‌دۆسیه‌كه‌ی به‌رده‌وامه.
PM:07:28:04/08/2025
ئه‌م بابه‌ته 556
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت