شاناز ئیبراهیم ئەحمەد: جینۆسایدی ئێزیدییەکان بیری هێناینەوە کە مەترسی لەناوچون و سڕینەوەمان کۆتایی نەهاتووە
وێستگەنیوز_
شاناز ئیبراهیم ئەحمەد، خانمی یەکەمی عێراق لە ساڵیادی جینۆسایدی ئێزیدییەکان پەیامێکی بڵاوکردەوە و دەڵێت: "دوایین جینۆساید کە بەدەستی تاریکپەرستانی داعش، دژی خەڵکی بێتاوان و سڤیلی شنگال و دەوروبەری لە 3ی ئابی 2014 بە بەرچاوی گەلانی دنیاوە ئەنجامدرا، ئازارەکەی لەوانیتر زۆر زیاتر و سەختتر و بەسوێترە. جارێکیتر بیری هێناینەوە کە مەترسی لەناوچون و سڕینەوەمان کۆتایی نەهاتووە و بەردەوامە و لە رۆژگارێکی ئاوا رەشیشدا لە تەنیایی تەنیاترین".
خانمی یەکەمی عێراق ئاماژەی بەوەشکردووە، جێی خۆشحاڵییە کە ئەمریکا و چەندین وڵاتی گەورە و گرنگی ئەوروپا ئەم تاوانەیان بە جینۆساید ناساندووە، بەڵام بەداخەوە دوای تێپەڕینی 11 ساڵ بەسەر ئەم کۆمەڵکوژییەدا، هێشتا برینەکانی خەڵکی شنگال نەک هەر ساڕێژ نەبوون، بەڵكوو رۆژ دوای رۆژ ئازاریان زیاتر ئەبێت.
دەقی پەیامەکە:
ئەمڕۆ بە دڵێکی پڕ لە خەمەوە یادی حەفتاو چوارەمین فرمان، واتە جینۆسایدی خوشک و برا ئێزدییەکانمان ئەکەینەوە. یادی کۆمەڵکوژییەک، کە یانزە ساڵ لەمەوبەر، لە 3ی ئابی 2014 بەرامبەر گەلە بێتاوانەکەمان لە شنگال و دەوروبەری ئەنجامدرا.
سەرەتا سڵاو ئەنێرم بۆ ئەو ئازیزانەی لەو شاڵاوە وەحشیانەدا بەناحەق شەهیدکران، سەری ڕێز بۆ قوربانییەکان دائەنەوێنم، بەتایبەتیش بۆ ئەو کێژۆڵە پاکیزە و نازدارانەمان کە چەتە دڕندە و تیرۆریستەکانی داعش بە دیلی بردنی و تا ئەمڕۆش چاومان هەر لە ڕێی گەڕانەوەی بەشێکیانە.
ئەگەرچی هەموو ئەو فرمان و جینۆسایدانەی پێشتر، کە بەسەر خوشک و برا ئێزدییەکانماندا هاتوون، هەمووی هەر یەک خەم و یەک کوڤان و یەک ئازاریان هەیە، بەڵام دوایین فرمان کە بەدەستی تاریکپەرستانی داعش، دژی خەڵکی بێتاوان و سڤیلی شنگال و دەوروبەری لە 3ی ئابی 2014 بە بەرچاوی گەلانی دنیاوە ئەنجامدرا، ئازارەکەی لەوانیتر زۆر زیاتر و سەختتر و بەسوێترە. جارێکیتر بیری هێناینەوە کە مەترسی لەناوچون و سڕینەوەمان کۆتایی نەهاتووە و بەردەوامە و، لە رۆژگارێکی ئاوا رەشیشدا لە تەنیایی تەنیاترین.
چما ئەگەر چیا رووتەن و بێ ئاو و بێ درەخت و بێ سێبەرەکەی شنگال، لەو گەرمایەی رۆژانی سەرەتای ئاب نەبووایە، کە بووە تاکە پەناگە بۆ هەندێک لە خوشک و برا ئێزیدییەکانمان، کام هێزی ناوچەیی و جیهانی، جگە لە چەند شەڕڤانێکی گیانفیدا، لە سەرەتای ئەو رۆژ و شەوانەی کە داعش لە شنگال و کۆجۆ و دەوروبەری ترس و مەرگی ئەچاند، بەهانای خەڵکەکەمانەوە چوو؟ لە راستیدا هەر ئەم نائومێدییە وای لە دانیشتوانی ئەو دەڤەرە کردووە، کە بەناچاری پەنا بۆ بژاردە دروستەکە ببەن و، ئیتر بەتەنیا بۆ پاراستنی سەر و ماڵ و کەرامەتیان پشت بە خۆیان و هێزی خۆیان ببەستن.
جێی خۆشحاڵییە کە ئەمریکا و چەندین وڵاتی گەورە و گرنگی ئەوروپا ئەم تاوانەیان بە جینۆساید ناساندووە، بەڵام بەداخەوە دوای تێپەڕینی 11 ساڵ بەسەر ئەم کۆمەڵکوژییەدا، هێشتا برینەکانی خەڵکی شنگال نەک هەر ساڕێژ نەبوون، بەڵكوو رۆژ دوای رۆژ ئازاریان زیاتر ئەبێت.
هێشتا پەرلەمانی عێراق ئەم کۆمەڵکوژی و تاوانە گەورەیەی بە رەسمی وەک جینۆساید نەناساندووە. لەکاتێکا ئەوە ئەرکی سەرەکی پەرلەمانی عێراقە تا بە دەرکردنی یاسایەک وابکات حکومەتە یەک لەدوا یەکەکانی عێراق بەرپرسیارێتی ئەو کەیسە لە ئەستۆ بگرن، بۆئەوەی جارێکیتر تاوانی لەو شێوەیە روونەداتەوە. هەروەها لەگەڵ حکومەتی هەرێمی کوردستان کار بۆ قەرەبووکردنەوەی هەموو ئەو زیانە مادی و مەعنەوییانە بکەن کە بەر خوشک و برا ئێزدییەکانمان کەوتوون. جگە لەوەش هاوکار بن بۆ گەڕانەوەی روفاتەکان و گەڕانەوەی ئەو کیژۆڵە پاکیزانەی هێشتا لە بەندی تیرۆییستانی داعشدان.
لە کۆتاییدا سڵاو بۆ رۆحی پێشمەرگە شەهیدەکانی شەڕی رزگاری داعش و هێزی هاوپەیمانان کە لە رۆژانی دواییدا هاوکارمان بوون.
دڵنییام لەوەی وەک چۆن دەستی بەهێزی دادپەروەری، دوای نزیک بە چل ساڵ عەجاج (جەلادەکەی نوگرەسەلمان)ی تەسلیم بە دادگا کرد، ئەو رۆژەش دێت هەمان دەست، تیرۆریستانی قین لەدڵی داعشیش، یەک لەدوای یەک لەبەرچاوی خوشک و برا ئێزدییەکانمان دادگایی ئەکرێن. بۆ ئەو ئامانجەش هەرچیم لەدەست بێت هەرگیز درێغی ناکەم.
شاناز ئیبراهیم ئەحمەد
PM:05:18:03/08/2025
ئه‌م بابه‌ته 452
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت