پزیشکانی نیشتەجێی خولاو هۆشداری دەدەن بە حکومەتی هەرێم

وێستگەنیوز-

پزیشکانی نیشتەجێی خولاو لە نەخۆشخانەکانی هەولێر و سلێمانی و کۆیە و راپەڕین و گەرمیان و سۆران بایکۆتی دەوامیان کرد.

لە راگەیەندراوێکدا پزیشکانی نیشتەجێی خولاو رایانگەیاند، "ئێمە وەکو پزیشکانی نیشتەجێی خولاوی ساڵی یەکەم و دووەم لەماوەی رابردوو هەموو ڕێگەیەکی یاسایی و مەدەنیمان گرتەبەر لەهەمبەر ئەم دۆخە کە مەترسی درووستدەکا لەسەر سیستەمی تەندرووستی کوردستان، لەکۆتا هەڵوێست بەیاننامەیەکمان بە ناو و ئیمزای 1600 پزیشک لەسەرتاسەری کوردستان لە گردبوونەوەیەک پێشکەشی لایەنی پەیوەندیدار کرد، بەڵام وەزارەتی تەندروستی نەک هیچ پلانێکی نییە بۆ چارەسەرکردنی ئەو کێشەیە، بەڵکو بەبێ حسابکردن بۆ رای ئێمەی پزیشک، تاک لایەنانە هەستاون بەشێواندنی سیستەمی پلەبەندی پزیشکی، بەجۆرێک کە پزیشکانی ساڵی یەکەم و دووەم ناچار دەکات دەوامی سێ خولی پزیشکی بخەنە ئەستۆی خۆیان، بەبێ هەڵسەنگاندنێکی ورد و حیسابکردن بۆ لێکەوتە وکورتخایەن و درێژخایەنەکان، و ئەو لۆدە زۆرەی کە دەکەوێتە سەر پزیشکان".

دەقی راگەیەندراوەکەی پزیشکانی نیشتەجێی خولاو:

راگەیەندراوی پزیشکانی نیشتەجێێ خولاوی ساڵی یەکەم و دووەمی هەولێر، سلێمانی، سۆران، کۆیە، ڕاپەڕین و گەرمیان سەبارەت بە بایکۆتکردنی دەوام
بۆ:
ڕای گشتی
ئەنجوومەنی وەزیران
وەزارەتی تەندروستی
بەڕێوبەرایەتییە گشتییە تەندرووستییەکان
بەڕێوبەرانی سەرجەم نەخۆشخانە و فریاکەوتنەکان

بەڕێزان ماوەی شەش مانگە دۆخێکی چەقبەستوو درووستبووە بەهۆی دانەمەزراندنی پزیشکانی تازە دەرچوو، بەجۆرێک سەرجەم پزیشکانی ساڵی یەکەم و دووەم و سێیەم تا پزیشکانی پایە بڵند بەو هۆیەوە ماوەی شەش مانگە لەدەرەوەی ناونیشان و ئەرکی پزیشکیمان خزمەتدەکەین و لە شوێنەکانی خۆمان ماوینەتەوە.

ئێمە وەکو پزیشکانی نیشتەجێی خولاوی ساڵی یەکەم و دووەم لەماوەی ڕابردوو هەموو ڕێگەیەکی یاسایی و مەدەنیمان گرتەبەر لەهەمبەر ئەم دۆخە کە مەترسی درووست دەکا لەسەر سیستەمی تەندرووستی کوردستان، لەکۆتا هەڵوێست بەیاننامەیەکمان بە ناو و ئیمزای ١٦٠٠ پزیشک لەسەرتاسەری کوردستان لە گردبوونەوەیەک پێشکەشی لایەنی پەیوەندیدار کرد.

بەڵام وەزارەتی تەندروستی نەک هیچ پلانێکی نییە بۆ چارەسەرکردنی ئەو کێشەیە، بەڵکو بەبێ حسابکردن بۆ ڕای ئێمەی پزیشک، تاک لایەنانە هەستاون بەشێواندنی سیستەمی پلەبەندی پزیشکی، بەجۆرێک کە پزیشکانی ساڵی یەکەم و دووەم ناچار دەکات دەوامی سێ خولی پزیشکی بخەنە ئەستۆی خۆیان، بەبێ هەڵسەنگاندنێکی ورد و حیسابکردن بۆ لێکەوتە وکورتخایەن و درێژخایەنەکان، و ئەو لۆدە زۆرەی کە دەکەوێتە سەر پزیشکان.

بۆیە لێرەوە ڕایدەگەیەنین کە لە ڕۆژی شەممەوە ٧ـی حوزەیرانی ٢٠٢٥ کاتژمێر ٨ـی بەیانی بایکۆتی دەوامکردن لە سەرجەم فریاکەوتن و نەخۆشخانەکانی هەولێر، سلێمانی، سۆران، کۆیە، ڕاپەڕین و گەرمیان بە هەموو بەشەکانیانەوە ڕادەگەیەنین تا جێبەجێکردنی داواکارییەکانمان.

داواکارین لە سەرۆکی حکومەتی و لایەنی پەیوەندیدار هەرچی زووە چارەسەر بۆ ئەو دۆخەی ئێستا بدۆزنەوە و سیستەمی تەندرووستی کوردستان بپارێزن لە ڕوخان.

داواکارییەکانمان بریتین لە:
١- وەستاندنی سیستەمی نوێی شیفتکردن بۆ پلەبەندی.
٢- بەشێوەیەکی فەرمی کاتێک دیاریبکرێ بۆ دامەزراندنی پزیشکانی نوێ و کۆتایی هێنان بەو دۆخە چەقبەستووە بە زووترین کات.

لێرەشەوە خەڵکی کوردستان ئاگاداردەکەینەوە کە ئەو دۆخەی دروستبووە بەهیچ شێوەیەک ئێمەی پزیشکان لێی بەپرس نین، بەڵکو پێشتر هەموو بەرێوبەرایەتی نەخۆشخانەکان ئاگادارکراونەتەوە و لە ئەگەری هەر لێکەوتێکی نەخوازراو، وەزارەتی تەندروستی لێی بەرپرسە. ئێمە ماوەی چوار مانگ خزمەتکردنمان لەدەرەوەی ناونیشان و ئەرکی پزیشکیمان و بەردەوامبوونمان لە خزمەتکردن لە بارودۆخی سەختی دارایی نیشانەی دڵسۆزیمانە، بەڵام گەیشتنمان بە بنبەست و بێ هیوایی لە چارەسەرکردنی کێشەکان گەیاندینی بەو بڕیارە.

پزیشکانی نیشتەجێی خولاوی هەولێر، سلێمانی، سۆران، کۆیە، ڕاپەڕین و گەرمیان
٦ـی حوزەیرانی ٢٠٢٥

PM:08:56:07/06/2025

ئه‌م بابه‌ته 988 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت