شاسوار عەبدولواحید: ئەگەر سەرۆکی حکومەتی هەرێم پارتی نەبێت نە وەزارەتمان دەوێت نە پۆست

وێستگەنیوز-

سەرۆکی جوڵانەوەی نەوەی نوێ رایدەگەیەنێت، ئەگەر سەرۆکی حکومەتی هەرێم پارتی نەبێت نە وەزارەتیان دەوێت نە پۆست، ئاماژەی بەوەکرد، داواکارین هاوڵاتییان بچن بۆ دەرهێنانی کارتی دەنگدان بۆ گۆڕینی دەسەڵاتی پارتی و یەکێتی.

ئەمڕۆ شەممە 5ی نیسانی 2025، شاسوار عەبدولواحید، سەرۆکی جوڵانەوەی نەوەی نوێ لە کۆنفرانسێکی رۆژنامەوانیدا رایگەیاند، "داواکارین هاوڵاتییان بچن بۆ دەرهێنانی کارتی دەنگدان بۆ گۆڕینی دەسەڵاتی پارتی و یەکێتی، چونکە دەنگیان کەمی کردووە و ئەگەر خەڵک بچێت بۆ دەنگدان کۆتاییان پێدێت".

ئاماژەی بەوەکرد، "ئەوەی پێشتروتم راست دەرچوو پارتی و یەکێتی باج و رسوماتیان لەسەر خەڵک زیاد کرد، چونکە ئەوەی پارتی و یەکێتی دەیکەن دزییەکی گەورەیە و پێش هەڵبژاردنیش وتومانە بە خەڵک کە پارتی و یەکێتی درۆتان لەگەڵ دەکەن و قسەکەشی وا دەرچوو".

شاسوار عەبدولواحید وتی، "تەحدای کەسی یەکەمی یەکێتی دەکەم لەبری ئەوەی هەموو رۆژێک بەرێگەی سەری رەش و بارەگاکانی پارتییەوە بێت، لەبری ئەوە بێت ئێمە کورسییەکانتان دەدەینێ کە 15 کورسییە و لەگەڵ کورسییەکانی یەکێتی دەبێتە 40 کورسی لەگەڵ 10 کورسی کۆمەڵ و یەکگرتوو، وەرن سەرۆک حکومەتێک دابنێن کە پارتی نەبێت ئەگەر دەتانەوێت گۆڕانکاری بکەن، ئێمە نە وەزارەتمان دەوێت نە پۆستمان دەوێت".

لەبارەی کارەبای 24 کاتژمێرییەوە سەرۆکی جوڵانەوەی نەوەی نوێ وتی، "ئێمە لەگەڵ ئەوەین کارەبای 24 کاتژمێری هەبێت، بەڵام ئەوەی ئێستا دەکرێت دزینێکی گەورەیە، لە چەند رۆژی داهاتوودا لە دادگای فیدراڵی هەندێک هەنگاو هەیە دەیگرینەبەر، چونکە ئەوەی هەیە دزینی پارەی خەڵکە بۆ گیرفانی چەند کەسێک".

PM:11:11:05/04/2025

ئه‌م بابه‌ته 1464 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت