لەبارەی دەستبەسەردا گرتنی ئۆتۆمبێلە بێسەرەتاکان روونکردنەوە دەدرێت

وێستگەنیوز-

نوێنەری ئۆتۆمبێلە بێسەرەتاكان رایدەگەیەنێت، ئومێدیان بەوە هەیە لەگەڵ پێكهێنانی كابینەی نوێی حكومەت كێشەی ئۆتۆمبێلە بێسەرەتاکان چارەسەر بكرێن، ئاماژە بەوەشدەکات، زیاتر لە 70 هەزار ئۆتۆمبێلی بێسەرەتا لە هەرێمی كوردستاندا هەیە.

ئەمڕۆ شەممە 5ی نیسانی 2025، سوارە عومەر كەریم، نوێنەری ئۆتۆمبێلە بێسەرەتاكان لە سلێمانی بە وێستگەنیوزی راگەیاند، "لەگەڵ پێكهێنانی كابینەی نوێی حكومەتی هەرێمی كوردستان، كێشەی ئۆتۆمبێلە بێسەرەتاكان یەكلادەبێتەوە".

ئاماژەی بەوەکرد، "ئومێدمان بەوە هەیە لەگەڵ پێكهێنانی كابینەی نوێی حكومەت كێشەی ئۆتۆمبێلە بێسەرەتاکان چارەسەر بكرێن، هەروەها تاكە چارەسەر ئەوەیە كارتێكی رێگەپێدانمان پێبدرێت، هەر رێكارێكی تر بگیرێتەبەر، دەبێتەهۆی شڵەژانی كۆمەڵایەتی و كێشەی ئابووری و كۆمەڵایەتیش بۆ سەدان خێزان دروستدەبێت".

نوێنەری خاوەن ئۆتۆمبێلە بێسەرەتاکان وتی، "زیاتر لە 70 هەزار ئۆتۆمبێلی بێسەرەتا لە هەرێمی كوردستاندا هەیە، بەڵێنی ئەوەشمان پێدراوە كە چارەسەرەكە لە بەرژەوەندی خەڵكی فەقیر و هەژاربێت".

هەروەها سوارە عومەر هەموو ئەو دەنگۆیانەی رەتكردەوە كە باسی دەستبەسەرداگرتی ئۆتۆمبێلە بێسەرەتاكان دەكات و ئاماژەی بەوەدا، "تەنها ئەو ئۆتۆمبێلانە دەستی بەسەردا دەگیرێت كە سەرپێچی یاساكانی هاتووچۆ دەكەن یاخود داواكراون".

نوێنەری خاوەن ئۆتۆمبێلە بێسەرەتاکان گلەیی لە هەندێك لە كەناڵەكانی راگەیاندن كرد و وتی" كێشەكە كێشەی خەڵكی فەقیر و هەژارە، بەڵام هەندێك لە كەناڵەكانی راگەیاندن كردوویانە بە كێشەی سیاسی و شارچێتی".

هاوكات سەرچاوەیەك لە وەزارەتی ناوخۆی حكومەتی هەرێمی كوردستان بەوێستگەنیوزی راگەیاند، "لەگەڵ دەستبەكاربوونی كابینەی نوێی حكومەت، چارەسەری كێشەی ئۆتۆمبێلە بێسەرەتاكان دەكرێت و لیژنەیەك بۆ ئەو مەبەستە پێکدەهێنرێت".

PM:06:33:05/04/2025

ئه‌م بابه‌ته 8088 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت