كۆمیسیۆنی عێراق: کات و شوێنی سێیەمین کۆنفرانسی گۆڕان بە فەرمی دیارینەکرابوو
وێستگەنیوز-
سەرۆكی لقی سلێمانی كۆمسیۆنی باڵای سەربەخۆی هەڵبژاردنەكانی عێراق ئاماژە بەوەدەكات، هیچ ئەندامێكمان بەشداریی كۆنفرانسی گۆڕانی گردەكەی نەكردووە، ئاماژە بەوەشدەکات، دەبێت هەردوو باڵەكەی گۆڕان (گردەكە و كوردسات) چاوەڕێ بكەن تاوەكو كۆمسیۆن نووسراو دەردەكات بۆ دیاریكردنی كات و شوێنی كۆنفرانس.
ئەمڕۆ شەممە 5ی نیسانی 2025، ئامانج عەزیز، سەرۆكی لقی سلێمانی كۆمسیۆنی باڵای هەڵبژاردنەكانی عێراق رایگەیاند، "هیچ ئەندامێكی لقی سلێمانی كۆمسیۆن بەشداریی كۆنفرانسەكەی گۆڕانی گردەكەی نەكردووە، چونكە ئەو داواكارییەی كە گۆڕانی گردەكە بۆ بەستنی كۆنفرانس پێشكەشیكردبوو، تێیدا داوایكردبوو كە لە فەرمانگەی پارت و رێكخراوە سیاسییەكان ئەندامێك بەشداربێت، بەڵام ئەوانیش بەشدارنەبوون".
ئاماژەی بەوەشكرد، "دەبێت هەردوو باڵەكەی گۆڕان (گردەكەو كوردسات) چاوەڕێ بكەن تاوەكو كۆمسیۆن نووسراو دەردەكات بۆ دیاریكردنی كات و شوێنی كۆنفرانس".
ئامانج عەزیز وتی، "بەپێی نووسراوێك كە 4ی نیسانی 2025 لەكۆمیسیۆنەوە دەرچووە، داوا لەهەردوو باڵەكەی گۆڕان كراوە چاوەڕێبكەن تاوەكو كۆمسیۆن كات و شوێنی كۆنفرانس دیاریی دەكات، دواتر كاتی كۆنفرانس دیاریبكەن، هەر بەگوێرەی نوسراوەكە، نابێت كاتی بەستنی كۆنفرانس لە 10ی نیسان تێپەڕ بكات".
سەرۆكی لقی سلێمانی كۆمسیۆنی باڵای هەڵبژاردنەكانی عێراق ئەوەشی خستەڕوو، "بەهۆی پشووەوە بەفەرمی نووسراوەكە نەگەیشتووەتە نوسینگەی كۆمسیۆن لە سلێمانی و ئاراستەی باڵەكانی گۆڕان نەكراوە كە تیایدا كات و شوێنی بەستنی كرنفرانس دیاری بكات".
ئەمڕۆ شەممە 5ی نیسانی 2025، لە شاری سلێمانی لە هۆڵی زەرگەتە سێیەمین کۆنفرانسی نیشتیمانی بزوتنەوەی گۆڕان لەژێر دروشمی (هاونیشتیمانی، دەستوور، دیموکراسی) بەسترا، بەپێی راگەیەندراوی کۆنفرانسەکە بێت، بە سەرکەوتووی کۆنفرانسەکە بەستراوە.
PM:05:49:05/04/2025
ئه‌م بابه‌ته 408
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت