راگەیەندراوی کۆتایی سێیەمین کۆنفرانسی نیشتیمانی بزووتنەوەی گۆڕان

وێستگەنیوز-

سێیەمین کۆنفرانسی نیشتیمانی بزووتنەوەی گۆڕان راگەیەندراوێکی بڵاوکردەوە و رایدەگەیەنێت، کۆنفرانسەکە سەرکەوتوو بووە.

لە راگەیەندراوەکەی سێیەمین کۆنفرانسی نیشتیمانی بزووتنەوەی گۆڕان هاتووە، "رۆژی شەممە، ٥ی ٤ی ٢٠٢٥، لە شاری سلێمانی لە هۆڵی زەرگەتە سێیەمین کۆنفرانسی نیشتیمانی بزوتنەوەی گۆڕان لەژێر دروشمی (هاونیشتیمانی، دەستور، دیموکراسی) بەسترا، کۆنگرە بەپێی کارنامەیەکی رێکخراو دەستی بە کارەکانی کرد".

ئاماژە بەوەکراوە، "لە دەستپێکدا وتاری لیژنەی باڵای سێیەمین کۆنفرانسی نیشتیمانی پێشکەش کرا و تێیدا ئاماژە بە پێداویستیە قانونیەکانی کۆنفرانس و ئاڵنگارییەکانی چەند ساڵی رابردوو درا بوو. دواتر وتاری بزوتنەوەی گۆڕان پێشکەش کرا. سەرەڕای باس کردن لە قەیرانەکان، ستراتیژی نوێ و میکانیزمی کار کردن ئاماژەی پێدرا بوو".

ئەوەشخراوەتەڕوو، "پاشان بە گوێرەی دەستوری ناوخۆی گۆڕان دەستەی بەرێوەبردنی سێیەمین کۆنفرانسی نیشتیمانی دیاریکران. پەسەند کردنی بەرنامەی سیاسی، دەستوری ناوخۆ، هەڵبژاردنی ئەندامانی جڤاتی نیشتیمانی، راپۆرتی دروشم و لۆگۆ، راپۆرتی پلاتفۆرمی هەڵبژاردن، راپۆرتی هەڵسەنگاندی ئەدائی نوێنەرانی حکومەت و ئەنجومەنە هەڵبژێردراوەکان و راپۆرتی هەڵسەنگاندنی ئەدائی جڤاتی نیشتیمانی جێبەجێ کران".

ئەوەش هاتووە، "بەرنامەی سیاسی بزوتنەوەی گۆڕان وەک خۆی پەسەند کرا. دەستوری ناوخۆی بزوتنەوەی گۆڕان چەند گۆڕانکارییەکی تێدا ئەنجام درا کە مەرجی قانونی فەرمانگەی پارت و رێکخراوە سیاسیەکانی کۆمسیۆنی باڵای سەربەخۆی هەڵبژاردنەکانی عێراق بوون بۆ بزوتنەوەی گۆڕان".

باس لەوەشکراوە، "هەڵبژاردنی ئەندامانی جڤاتی نیشتیمانی بە شێوەی لیست و بە دەنگدانی ئاشکرا بە سەرکەوتووی ئەنجام درا. راپۆرتی سەرجەم لیژنەکانی دیکەش پەسەند کران".

لە راگەیەندراوەکەدا ئاماژە بەوەدرا، "سەرکەوتنی سێیەمین کۆنفرانسی نیشتیمانی لە هاونیشتیمانیان و گۆڕانخوازان پیرۆز بێت. لە ئەمڕۆوە ئەرکی گەورەی نیشتیمانی، سیاسی، دیموکراتی و رێکخراوەی ئەکەوێتە ئەستۆی هەمووان".

PM:04:11:05/04/2025

ئه‌م بابه‌ته 336 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت