رێزان عه‌سكه‌ری: هه‌ردوو باڵه‌كه‌ی گۆڕان له به‌رژه‌وه‌ندی خه‌ڵك نین
وێستگه‌نیوز-
رێزان عه‌سكه‌ری (دایكی شه‌هید گه‌رمیان) كه یه‌كێك له به‌شداربووانی كۆنفرانسه‌كه‌ی ئه‌مڕۆی بزووتنه‌وه‌ی گۆڕان ( باڵی گردی زه‌رگه‌ته) بوو، دوای ته‌واوبوونی كۆنفرانسه‌كه له‌لێدوانێكدا بۆ رۆژنامه‌نووسان وتی: "ئه‌مڕۆ له كۆنفرانسه‌كه‌دا (55) كه‌س ئاماده‌كرابوون و دیزاینكرابوون و دانران بۆ ئه‌ندامی جڤاتی نیشتمانی بزووتنه‌وه‌ی گۆڕان".
وتیشی: "ئێستا بزووتنه‌وه‌ی گۆڕان بووه به دوو به‌شه‌وه، نه گۆڕانی كوردسات و نه گۆڕانی گردی زه‌رگه‌ته نه‌یانتوانی به‌ڵێنه‌كانی كاك نه‌وشیروان ببه‌نه‌سه‌رو بێ وه‌فابوون به‌رامبه‌ر به نیو ملیۆن ده‌نگده‌ری بزووتنه‌وه‌ی گۆڕان".
باسی له‌وه‌شكرد كه "هه‌ردوو باڵه‌كه‌ی گۆڕان له به‌رژه‌وه‌ندی خه‌ڵك نه‌بوون و ته‌نها كار بۆ چه‌ند پله و پۆست و كه‌سێك ده‌كه‌ن".
رێزان عه‌سكه‌ری راشیگه‌یاند كه "له ناو كۆنفرانس رێگه‌یان نه‌دا رای خۆمان بڵێین. له‌ئێستا به‌دواوه سه‌ر به هیچ باڵێكیان نیم و ناشبم، وه‌ك خانه‌واده‌ی شه‌هید گه‌رمیان سه‌ر به هیچ حزب و لایه‌نێك نین. سه‌ر به هیچ باڵًێكی گۆڕان نین نه گردی زه‌رگه‌ته و نه‌كوردستان و ناشبین".
PM:03:33:05/04/2025
ئه‌م بابه‌ته 464
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت