دانا عه‌بدولكه‌ریم: كۆنفرانسه‌كه‌مان زۆر سه‌ركه‌وتوو بوو
وێستگه‌نیوز-
دانا عه‌بدولكه‌ریم ئه‌ندامی كۆنفرانسی سێیه‌می بزووتنه‌وه‌ی گۆڕان (باڵی گردی زه‌رگه‌ته) به كه‌ناڵ 8ی راگه‌یاند كه كۆنفرانسه‌كه‌مان زۆر سه‌ركه‌وتوو بووه، ده‌شڵێت: "نه‌یانهێشت نوێنه‌ری كۆمسیۆن ئاماده‌ی كۆنفرانسه‌كه بێت".
دانا عه‌بدولكه‌ریم له لێدوانێكدا بۆ كه‌ناڵ 8 وتی: "به‌داخه‌وه نوێنه‌ری كۆمسیۆنی باڵای هه‌ڵبژاردنه‌كان له‌ژێر فشاری سیاسیدا نه‌هاتبوو بۆ كۆنفرانسه‌كه".
ئاماژه‌شی به‌وه‌دا كه "سه‌رۆكی كۆمسیۆنی باڵای هه‌ڵبژاردنه‌كان به‌شێوه‌یه‌كی ناته‌ندروست ده‌ستوه‌ردانی كردووه و نه‌یهێشت ستافی كۆمسیۆن بێن بۆ سه‌رپه‌رشتیكردنی كۆنفرانسه‌كه".
وتیشی: "كه‌سێك كه پیشه‌ی دادوه‌ره و به‌رپرسی كۆمسیۆنه ده‌بوایه سوێنده‌كه‌ی خۆی بپاراسته‌یه و ئێمه له دادگای فیدڕاڵی شكات له سه‌رۆكی كۆمسیۆن ده‌كه‌ین له‌سه‌ر ده‌ستوه‌ردانه‌كه‌ی".
دانا عه‌بدولكه‌ریم باسی له‌وه‌شكرد كه "هه‌موو رێكاره كۆنفرانسییه‌كه‌مان وه‌كو خۆی ته‌واو كردووه و كۆنفرانسێكی زۆر سه‌ركه‌وتوومان كردووه".
ئه‌وه‌شی خسته‌ڕوو كه "به‌شداریكردنی ژماره‌یه‌كی زۆر كه زیاتر له هه‌زار و 300 كه‌سه شه‌رعیه‌ت ده‌دات به كۆنفرانسه‌كه".
له وه‌ڵامی ئه‌و پرسیاره‌ی كه ئایا خۆی بۆ پۆستی رێكخه‌ری گشتی كاندید ده‌دات، دانا عه‌بدولكه‌ریم وتی: "هێشتا زووه قسه له‌سه‌ر ئه‌و پرسه بكرێت. گرنگ به لامانه‌وه هه‌ڵسانه‌وه‌ی بزووتنه‌وه‌ی گۆڕان و ئیشكردنه بۆ پره‌نسیپه‌كانی".
راشیگه‌یاند كه "به‌گوێره‌ی ده‌ستووره‌كه هه‌ركه‌س ئه‌ندامی جڤاتی نیشتمانی نه‌بێت، ناتوانێت خۆی بۆ پۆستی رێكخه‌ری گشتی گۆڕان كاندید بكات"، به‌وشێوه‌یه‌ش دانا ئه‌حمه‌د مه‌جید كه ئێستا خۆی وه‌ك رێكخه‌ری گشتی ده‌ناسێنێت، ناتوانێت ببێته رێكخه‌ری گشتی بزووتنه‌وه‌ی گۆڕان.
PM:02:49:05/04/2025
ئه‌م بابه‌ته 1492
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت