پارتی باره‌گای مه‌كته‌بی رێكخستنی له كه‌ركوك كرده‌وه و به‌رپرسه‌كه‌ی ده‌ڵێ "نابینه سه‌رئێشه"
وێستگه‌نیوز-
دوای 8 ساڵ پارتی دیموكراتی كوردستان باره‌گای مه‌كته‌بی رێكخستنی له كه‌ركوك كرده‌وه، به‌رپرسی ده‌سته‌ی كارگێڕی مه‌كته‌بی سیاسیی ئه‌و حزبه‌ش ده‌ڵێت: "ئه‌وانه‌ی ئه‌مڕۆ خۆیان به به‌هێز ده‌زانن له‌سه‌ر خاڵی لاوازی كورده"، بەرپرسی مەكتەبی رێكخستنی پارتی-ش ده‌ڵێت: "نابینه سه‌رئێشه".
ئه‌مڕۆ شه‌ممه 5ی نیسانی 2025 دوای تێپه‌ڕینی نزیكه‌ی هه‌شت ساڵ، باره‌گای مه‌كته‌بی رێكخستنی پارێزگای كه‌ركوك-گه‌رمیان به ئاماده‌بوونی به‌رپرسانی باڵای پارتی، له گه‌ڕه‌كی عه‌ره‌فه‌ی كه‌ركوك كرایه‌وه.
فازڵ میرانی به‌رپرسی ده‌سته‌ی كارگێڕی مه‌كته‌بی سیاسیی پارتی دیموكراتی كوردستان له رێوره‌سمی كردنه‌وه‌ی باره‌گاكه‌یاندا وتی: "ئێمه نه‌هاتووینه‌ته كه‌ركوك، به‌ڵكو ئێمه هه‌ر له كه‌ركوك بووین و له‌كه‌ركوكیش ده‌بین".
فازڵ میرانی وتی: "ئێمه نابێت حوكم له ڕووكه‌ش بكه‌ین، ده‌بێت حوكم له جه‌وهه‌ری كاره‌كان بكه‌ین، وه ئه‌بێت به چاوی میلله‌ت و جه‌ماوه‌ر سه‌یری خۆمان بكه‌ین، چ له‌ڕووی حزبیه‌وه چ له رووی به‌ڕێوه‌بردنی ئیداریی و نه‌ته‌وایه‌تییه‌وه".
وتیشی: "سه‌رۆك مه‌سعود بارزانی و پارتی هه‌میشه ئامانجیان پێكه‌وه‌ژیان و برایه‌تی و پاراستنی مافی پێكهاته‌كانی كه‌ركوك بووه، هه‌روه‌ها له‌كاتی هێرشه‌كانی داعش، پێكهاته‌كانی كه‌ركوك داوایان له سه‌رۆك مه‌سعود بارزانی كرد، پێشمه‌رگه كه‌ركوك بپاریزێت، تا وه‌كو موسڵی لێ نه‌یه‌ت".
باسی له‌وه‌شكرد كه "ئه‌وانه‌ی ئه‌مڕۆ خۆیان به به‌هێز ده‌زانن له‌سه‌ر خاڵی لاوازی كورده، ئه‌گه‌رنا ئه‌وه‌نده به‌هێز نه‌بوونه كه نكۆڵی له‌ده‌ستوور و پێكه‌وه ژیان و په‌یمانه‌كان بكه‌ن، كه خۆیان به‌وشێوه‌یه ده‌بینن ته‌حه‌كوم به مووچه و دابه‌شكردنی خۆراكی هاووڵاتیان بكه‌ن".
ئه‌و به‌رپرسه باڵایه‌ی پارتی جه‌ختی له‌وه كرده‌وه كه "ده‌بێت هه‌موومان به‌خۆماندا بچینه‌وه، كه بۆچی مافمان خوراوه؟ یان بۆچی سه‌ركه‌وتووین؟ بۆیه ئه‌بێت له هۆیه‌كان بكۆڵینه‌وه نه‌ك له‌ده‌رئه‌نجامه‌كان، ئه‌مه‌ش یه‌كێك له خاڵه‌كانه كه ئێمه هه‌میشه خۆمان به‌ده‌رئه‌نجامه‌كان سه‌رقاڵ ده‌كه‌ین، هه‌روه‌ها هۆیه‌كان و بیركردنه‌وه‌كان وه‌لا ده‌نێین".
راشیگه‌یاند كه "پارتی سووره له‌سه‌ر ئه‌وه‌ی پێداوچوونه‌وه به‌خۆدا بكرێت، چونكه پێویسته بۆ یه‌كڕیزی و یه‌كهه‌ڵویستی بۆ گه‌ڕانه‌وه‌ی هێزی كوردستانی و په‌له‌كردن له دامه‌زراندنی په‌رله‌مان و حكوومه‌تی نوێی هه‌رێمی كوردستان، بۆ ئه‌وه‌ی ئه‌وانه‌ی نكۆڵیان كردووه بگه‌ڕێنه‌وه بۆ هاوپه‌یمانییه‌كه".
لای خۆیه‌وه هیوا ئەحمەد، بەرپرسی مەكتەبی رێكخستنی پارتی لە كەركوك، لە میانەی كردنەوەی بارەگای حزبەكەی لە كەركوك ڕاگەیاند: ئێمە لەپارتی وەك هەمیشە دەرك بە هەستیاری دۆخی ناوچەكە و جیهان دەكەین، بۆیە وەك بەرپرسیارێتی سەرشانمان بۆ گەلی كورد و بۆ گەلی عێراق بڕیارماندا كە بارەگاكەمان لە كەركوك لەدوای هەشت ساڵ دابڕان بكەینەوە، بۆیە ئێستا لەهەمووكات زیاتر یەكڕیزی گەلی كورد پێویستە بۆ كەركوك.
وتیشی: "كردنەوەی بارەگاكەی ئێمە لە كەركوك نابێتە سەر ئێشە بۆ هیچ لایەنێكی دیكە، بەڵكو دەمانەوێت ببینە هەوێنی یەكڕیزی لەنێوان لایەنە كوردییەكان و لایەنەكانی دیكەی كەركوك".
بەرپرسی مەكتەبی رێكخستنی پارتی لە كەركوك، ئەوەشی خستەڕوو، ئێمە هاتوینەتەوە بۆ كەركوك بۆ ئەوەی چارەسەری كێشەو گرفتەكان بكەین، دەمانەوێت دەستلەناو دەست كورد عەرەب و توركمان و پێكهاتەكانی دیكە خزمەتی وڵات و شاری خۆرمان بكەین، بۆ ئەوەش داوا لە ڕێكخستەكانی پارتی دەكەم كە بۆ لەمەودوا شار بەشار دەكەوینە ناو جەماوەی خۆمان و بەشداری خۆشی و ناخۆشییەكانی كەركوكییەكان دەبین.
PM:12:53:05/04/2025
ئه‌م بابه‌ته 800
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت