دوای رێککەوتن لەگەڵ دیمەشق هێزە سەربازییەکان لە گەڕەکە کوردییەکانی حەلەب دەکشێنەوە

وێستگەنیوز-

لە چوارچێوەى رێککەوتنی نێوان ئەنجومەنی گشتیی گەڕەکی شێخ مەقسود و ئەشرەفیە و دەسەڵاتدارانی دیمەشق، هێزەکانى یەپەگە و یەپەژە و هێزەکانی رزگاری عەفرین لە گەڕەکەکانی شاری حەلەب دەکشێنەوە.

ئەمڕۆ هەینی 4ی نیسانی 2025، ئاژانسى هاوار بڵاویکردەوە، لە چوارچێوەى رێککەوتنی نێوان ئەنجومەنی گشتیی گەڕەکی شێخ مەقسود و ئەشرەفیە و دەسەڵاتدارانی دیمەشق، هێزەکانى یەپەگە و یەپەژە و هێزەکانی رزگاری عەفرین لە گەڕەکە کوردییەکانی شاری حەلەب دەکشێنەوە.

ئاماژە بەوەکراوە، هێزە سەربازییەکانی جێگیر لە گەڕەکی ئەشرەفیە و شێخ مەقسود دەستیان بە کشانەوە کردووە بۆ ناوچەی رۆژهەڵاتی فورات، ئەمەش بەگوێرەى مادەی شەشەمی رێککەوتنەکەیە لەگەڵ دیمەشق.

ئەوەش دوای ئەوە دێت، دوێنێ پێنجشەممە خاڵی یەکەمی رێککەوتنی نێوان هەردوولا جێبەجێکرا، بە ئازادکردنی 146 زیندانی هێزە کوردییەکان و 97 ئەندامی حکومەتی دیمەشق.

یەکینەکانی پاراستنی گەل یەپەگە لە راگەیەندراوێکدا گوتی، پاراستنی ئەو دوو گەڕەکە رادەستی هێزەکانی ئاسایشی ناوخۆ کراون.

رۆژی یەکى ئەم مانگە، رێککەوتنێک لەنێوان ئەنجومەنى گشتیی گەڕەکی شێخ مەقسوود و ئەشرەفیە و دەسەڵاتدارانی دیمەشق ئەنجامدرا، رێککەوتنەکە 14 بڕگەی لەخۆگرتووە.

PM:05:38:04/04/2025

ئه‌م بابه‌ته 724 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت