هەردوو باڵەکەی بزووتنەوەی گۆڕان پشتئەستوور بە نووسراوی کۆمسیۆن؛ دوو کاتی جیاواز بۆ کۆنفرانس دیاری دەکەن
وێستگەنیوز_
دوای ئەوەی بزووتنەوەی گۆڕانی باڵی کوردسات رایگەیاند، لەلایەن کۆمیسیۆنەوە ئاگادارکراونەتەوە 10ـی نیسان و لە دەرەوەی گردی زەرگەتە کۆنفرانس بکەن. لە بەرامبەردا باڵی گردی زەرگەتە دەڵێت، سبەی 05ـی نیسان کۆنفرانس دەکەن.
بەگوێرەی راگەیەندراوی جیاوازییان، هەردوو باڵەکەی بزووتنەوەی گۆڕان دەڵێن، نووسراوی کۆمیسیۆنیان هەیە.
باڵی کوردسات دەڵێت، ئەمڕۆ بە نووسراوی ژمارەی 875 کە لە 27ـی 3ـی 2025 دەرچووە، ئاگادار کراونەتەوە 10ـی نیسان کۆنفرانس بکەن. هاوکات، باڵی گردی زەرگەتە دەڵێت، 20ـی 2ـی 2025، فەرمانگەی پارت و رێکخراوە سیاسییەکان بە نووسراوی ژمارە 207 داوای لێکردوون وەکو گۆڕان لە گردەکە و لە 05ـی نیسان کۆنفرانس بکەن.
رۆڤان سەروەت، رێپێدراوی بزووتنەوەی گۆڕان لە ئۆفیسی سلێمانی کۆمیسیۆنی باڵای سەربەخۆی هەڵبژاردنەکان (باڵی کوردسات)، رایگەیاندووە، "بۆ کۆنفرانسی نیشتمانیی بزووتنەوەی گۆڕان، ئەمڕۆ نووسراوی فەرمی کۆمسیۆنمان بەدەست گەیشت، کە لە 10ـی ئەم مانگەدا کۆنفرانسەکە بکەین".
ئاماژەی بەوەشکردووە، بۆ کۆنفرانسەکە هەموو ئامادەکارییەکیان لەژێر راسپاردە و رێنماییەکانی فەرمانگەی پارت و رێکخراوە سیاسییەکانی کۆمیسیۆنی باڵای سەربەخۆی هەڵبژاردنەکان و ئۆفیسی پارێزگای سلێمانی کۆمیسیۆن کردووە.
رۆڤان سەروەت دەڵێت: "بە نووسراوی فەرمانگەی پارت و رێکخراوە سیاسییەکان ژمارە (875)، لە رێککەوتی 2ـی 3ـی 2025، بە فەرمی ئاگادار کراینەوە بۆ بەستنی کۆنفرانسی نیشتمانیی بزووتنەوەی گۆڕان".
لای خۆشیانەوە، نزار مه‌حموود، ئەندامی جڤاتی نیشتمانیی بزووتنەوەی گۆڕان کە لەگەڵ باڵی گردی زەرگەتەدایە رایگەیاندووە، "سبەی کۆنفرانسی بزووتنەوەکەمان بە فەرمی بەڕێوە دەبەین و هیچ گۆڕانێک رووینەداوە".
نزار مەحموود وتویەتی: "ئەوانەی بانگەشەی کۆنفرانس دەکەن لە 10ـی ئەم مانگە، ناڕاستە و بنەمای نییە، بەڵکو هۆکاری کەمیی مانەوەی کاتی کۆنفرانسەکەمانە ئەوانیش دەست بۆ هەموو بابەتێک دەبەن".
هەروەها دوێنێ لە کۆنفرانسێکی رۆژنامەوانیدا، یاسین حەمەعەلی، لێپرسراوی ژووری هەڵبژاردنی بزووتنەوەی گۆڕان (گردی زەرگەتە) وتی: "5ـی نیسان لە سلێمانی سێیەمین کۆنفرانس دەبەستین، بەستنی کۆنفرانس پاڵپشتە بە بڕیارەکانی کۆمیسیۆن و فەرمانگەی پارت و رێکخراوە سیاسییەکان."
PM:03:40:04/04/2025
ئه‌م بابه‌ته 800
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت