دەنگۆی دیارنەمانی فرۆکەیەک بە 75 سەرنشینەوە کە زۆرینەی کوردن "دوورە لە راستییەوە"
وێستگەنیوز_
رەنج پشدەری، رۆژنامەنووس و چالاکوانی بواری پەنابەران رایدەگەیەنێت، "فڕۆكه‌یه‌ك بە 75 سەرنشینەوە دیار نەماوە كه بەشی زۆریان کوردن". وێستگەنیوز'ـیش بەدواداچوون بۆ بابەتەکە دەکات و چەند سەرچاوەیەک دووپاتی دەکەنەوە کە: "هەواڵەکە ناڕاستە".
رۆژنامەنووس رەنج پشدەری لە تۆمارێکی ڤیدیۆییدا دەڵێت: "رۆژی عارفە (رۆژێک بەر لە جەژنی رەمەزان)، فرۆکەیەک لە شاری مانچستەر بەڕێدەکەوێت بۆ قەتەڕ بۆ ئەوەی لەوێوە بگەڕێتەوە بۆ سلێمانی و بۆ یەکەم رۆژی جەژن لە کوردستان بن. فرۆکەکە بە 75 سەرنشینی هەڵگرتووە کە بەشێکی زۆریان کوردن و لە نێویاندا ژن و منداڵ هەیە."
"بەڵام کاتێک لە مانچستەر بەڕێدەکەون و دەگەنە فرۆکەخانەی قەتەڕ، پێیان دەڵێن فرۆکەکە تێكچووە و دەبێت لێرە دابەزن، شەوێک دەیانبەنە هۆتێل و لەوێ دەمێننەوە، بۆ بەیانی رۆژی دواتر، دەڵێن چاوەڕێ بکەن هەتا فرۆکەیەکتان بۆ پەیدا دەکەین و دەتانگەڕێنینەوە بۆ سلێمانی، بەڵام ئێستا ماوەی سێ رۆژە سەرجەم ئەو سەرنشینانە لە هیچ شوێنێک دەنگیان نەماوە و بێ سۆراغن." رەنج پشدەری وا دەڵێت.
ناوبراو ئەوەشی خستووەتەڕوو: "دەڵێن باشترین فرۆکەخانە لە قەتەڕە، کاتێک فرۆکەیەک لە وڵاتێکی دیکەوە دەچێتە قەتەڕ، لەوێ کێشەیەکی بۆ دروست دەبێت؛ ئەوا رایناگرن. بۆ نموونە ئەگەر فرۆکەیەک لە بەریتانیا هاتبێت و بیەوێت بۆ سلێمانی بڕوات، ئەوا یەکسەر خەڵکەکە دەگوازنەوە بۆ تورکیا و لەوێوە هەوڵدەدەن بیانگەڕێننەوە بۆ کوردستان. بۆیە ئەگەرێک هەیە کە ئەمانە لە تورکیا دواکەوتبن."
رەنج پشدەری دەڵێت: دووەم ئەگەریش، دەڵێن خراپترین هێڵی ئینتەرنێت هی فرۆکەخانەی قەتەڕە. سێیەم ئەگەریش ئەوەیە کە گومان دەکرێت، بەهۆی ئەوەی ئەو کەسانەی هاتوون و 75 کەسن و ژمارەیان زۆرە، فرۆکەخانەی قەتەڕ نەیتوانیوە فرۆکەیان بۆ دابین بکات و بیانگەڕێنێتەوە بۆ کوردستان بەهۆی زۆری پەستان و قەرەباڵخییەوە لە رۆژانی جەژندا."
دوای ئەم تۆمارە ڤیدیۆییە، وێستگەنیوز بۆ بەدواداچوون و دەستکەوتنی زانیاری زیاتر، پەیوەندی بە ئۆفیسی هێڵی ئاسمانی قەتەریەوە کرد، پرسیاری لەبارەی ئەم پرسەوە کرد و ئەوانیش وتیان: "دواکەوتنێکی فرۆكە هەبووە، بەڵام دواتر چارەسەر کراوە؛ و ئەم دەنگۆیە راست نییە."
هاوکات، پاش چەند پەیوەندییەکی جیاواز، چەند بەرپرسێکی باڵای حکومەتی هەرێمی کوردستان سەرلەبەری ئەو هەواڵەیان رەتکردەوە و رایانگەیاند، "هەتا ئێستا لە حاڵەتێکی لەو جۆرە ئاگادار نەکراوینەتەوە و دەنگۆی دیارنەمانی فرۆکەیەک لە قەتەڕ دوورە لە راستییەوە."
PM:01:25:03/04/2025
ئه‌م بابه‌ته 1296
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت