سه‌رۆكایه‌تیی هه‌رێم: له نزیكه‌وه به‌دواداچوون بۆ هێرشه تاوانكارییه‌كه‌ی دوێنێی دهۆك ده‌كه‌ین
وێستگه‌نیوز-
سه‌رۆكایه‌تیی هه‌رێمی كوردستان رایگه‌یاند كه به‌توندی ئیدانه‌ی هێرشه تاوانكارییه‌كه‌ی دوێنێی دهۆك ده‌كه‌ن، ده‌شڵێت: "له نزیكه‌وه به‌دواداچوونی بۆ ده‌كه‌ین".
ئه‌مڕۆ چوارشه‌ممه سه‌رۆكایه‌تیی هه‌رێمی كوردستان راگه‌یه‌ندراوێكی بڵاوكرده‌وه و تیایدا هاتووه كه "سه‌رۆكایه‌تیی هه‌رێم له نزیكه‌وه له‌گه‌ڵ ده‌زگا په‌یوه‌ندیداره‌كانی هه‌رێمی كوردستاندا به‌دواداچوون بۆ ئه‌و هێرشه تاوانكارییه ده‌كات كه دوێنێ له ڕووداوێكی نامۆدا له دهۆك، كۆمه‌ڵێك له جه‌ژنگێڕانی ئه‌كیتۆ له هاووڵاتییانی مه‌سیحیمان تیایدا به ئامانج گیران و بووه هۆی برینداربوونی دوو كه‌س".
سه‌رۆكایه‌تیی هه‌رێم ده‌ڵێت: "له كاتێكدا به توندی ئه‌و تاوانه سه‌ركۆنه ده‌كه‌ین، هه‌موو كوردستانییان دڵنیا ده‌كه‌ینه‌وه كه هه‌رێمی كوردستان وه‌ك هه‌میشه به نیشتمانی پێكه‌وه‌ژیان و ئارامی و سه‌قامگیری بۆ هه‌موو پێكهاته‌كانی ده‌مێنێته‌وه".
جه‌ختیش له‌وه ده‌كاته‌وه كه "به هیچ شێوه‌یه‌ك ڕێگه به تێكدانی كولتووری پێكه‌وه‌ژیان و یه‌كترقبووڵكردن و لێبورده‌یی نادرێت، تاوانكاریش به سزای یاساییی خۆی ده‌گات".
دوێنێ سێشه‌ممه له شاری دهۆك كه‌سێك به چه‌قۆوه هێرشی كرده‌سه‌ر ئاهه‌نگگێڕانی ئاهه‌نگی جه‌ژنی ئه‌كیتۆ و دوو كه‌سی بریندار كرد.
PM:04:50:02/04/2025
ئه‌م بابه‌ته 464
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت