له به‌غداوه داواده‌كرێت سكاڵا دژی دڵشاد بارزانی بجوڵێندرێت
وێستگه‌نیوز-
ئه‌ندامێكی ئه‌نجومه‌نی نوێنه‌رانی عێراق به‌فه‌رمی داوا له داواكاری گشتی ده‌كات سكاڵا له‌دژی دڵشاد بارزانی، برای مه‌سعود بارزانی سه‌رۆكی پارتی دیموكراتی كوردستان بجوڵێنێت به‌هۆی به‌شداریكردنی له بۆنه‌یه‌كدا له بینای باڵیۆزخانه‌ی ئیسرائیل له وڵاتی ئه‌ڵمانیا.
رۆژی هه‌ینی 21ی ئاداری 2025، مسته‌فا جه‌بار سه‌نه‌د ئه‌ندامی ئه‌نجومه‌نی نوێنه‌رانی عێراق به نووسراوێك داوای له ده‌زگای داواكاری گشتی كرد سكاڵا دژی (دڵشاد مسته‌فا محه‌مه‌د بارزانی) نوێنه‌ری حكومه‌تی هه‌رێمی كوردستان له ئه‌ڵمانیا بجوڵێنێت به‌هۆكاری به‌شداریكردنی له ئاهه‌نگی جه‌ژنی نه‌ورۆز له باڵیۆزخانه‌ی ئیسرائیل.
له نووسراوه‌كه‌دا مسته‌فا جه‌بار ئاماژه‌ی به‌وه‌داوه كه ئه‌و كاره‌ی دڵشاد بارزانی "تاوانی ئاساییكردنه‌وه‌ی په‌یوه‌ندییه‌كانه له‌گه‌ڵ قه‌واره‌ی زایۆنی كه به‌پێی یاسا سزای بۆ دانراوه، بۆیە پێویستە بەگوێرەی یاسای تەجریمکردنی ئاساییکردنەوەی پەیوەندی لەگەڵ ئیسرائیل بە یاسایی ژمارە 1ـی 2022 سزا بدرێت".
ئه‌و په‌رله‌مانتاره له‌گه‌ڵ نووسراوه‌كه‌دا (C D)یه‌ك و لینكێكی ئه‌لیكترۆنی هاوپێچ كردووه كه تیایدا نوێنه‌ره‌كه‌ی حكومه‌تی هه‌رێم له باڵیۆزخانه‌ی ئیسرائیل له ئه‌ڵمانیا ده‌ركه‌وتووه.
پێشتر كه‌ناڵێكی سه‌ر به پارتی دیموكراتی كوردستان وێنه‌كانی به‌شداریكردنی دڵشاد بارزانی له ئاهه‌نگه‌كه‌ی باڵیۆزخانه‌ی ئیسرائیل بڵاوكرده‌وه، به‌ڵام دوای ئه‌وه‌ی زانییان هه‌ڵه‌یان كردووه، زوو به زوو وێنه‌كانیان سڕییه‌وه.
له 26ی ئایاری 2022 په‌رله‌مانی عێراق، یاسای تەجریمکردنی ئاساییكردنه‌وه‌ی په‌یوه‌ندییه‌كانی عێراقی له‌گه‌ڵ ئیسرائیل په‌سه‌ند كرد. ئه‌م یاسایه به تێكڕای ده‌نگی 275 ئه‌ندام په‌رله‌مان په‌سه‌ند كرا.
یه‌كێك له خاڵه گرنگه‌كانی یاسای نوێ كه له په‌رله‌مان په‌سه‌ند كرا ئه‌وه‌یه كه، باسی ئه‌وه ده‌كات ھه‌موو كار و چالاكییه‌ك له‌گه‌ڵ ئیسرائیل قه‌ده‌غه‌یه؛ ھه‌روه‌ھا نابێت عێراق ھیچ په‌یوه‌ندییه‌كی سیاسی، دیپلۆماسی، ئابووری و كۆمه‌ڵایه‌تیی له‌گه‌ڵ ئیسرائیلدا ھه‌بێت.
ئه‌م یاسایه ته‌نانه‌ت چالاكیی ڕۆشنبیری، میدیایی، سۆشیال میدیا و ڕێكخراوه‌كانی كۆمه‌ڵگه‌ی مه‌ده‌نییش له‌گه‌ڵ ئیسرائیل به تاوان ده‌ناسێنێت.
به گوێره‌ی یاساكه، ھه‌ر كه‌سێك یان لایه‌نێك پێچه‌وانه‌ی ئه‌مه كار بكات، سزاكه‌ی زیندانی ھه‌تاھه‌تایی یان له‌سێداره‌دان ده‌بێت.
PM:12:24:22/03/2025
ئه‌م بابه‌ته 11244
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت