هۆشیار زێباری: مانەوەی بەڕێوەبەرایەتیی خۆسه‌ر له چوارچێوەی دانوستان و كاری لیژنه هاوبه‌شه‌كاندایە
وێستگه‌نیوز-
هۆشیار زێباری ئه‌ندامی مه‌كته‌بی سیاسی پارتی دیموكراتی كوردستان پێیوایه كه دوای رێككه‌وتنه‌كه‌ی نێوان مه‌زڵوم عه‌بدی و ئه‌حمه‌د شه‌رع، هێزه‌كانی سوریای دیموكرات ده‌مێنێته‌وه، ده‌شڵێت: "مانەوەی بەڕێوەبەرایەتیی خۆسه‌ر له چوارچێوەی دانوستان و كاری لیژنه هاوبه‌شه‌كاندایە".
هوشیار زێباری، ئه‌ندامی مه‌كته‌ب سیاسی پارتی دیموكراتی كوردستان له پلاتفۆرمی (ئێكس) نووسیویه‌تی: "رێككه‌وتنی مێژوویی ئه‌مڕۆی نێوان ئه‌حمه‌د ئه‌لشه‌رع سه‌رۆك كۆماری قۆناغی راگوزه‌ری سوریا و مه‌زڵوم عه‌بدی، فه‌رمانده‌ی هێزه‌كانی هێزی سوریای دیموكرات له دیمه‌شق، هه‌نگاوێكی گرنگه بۆ داڕشتنی ئاینده‌ی سوریا".
ئه‌و ئه‌ندامه‌ی مه‌كته‌بی سیاسی پارتی پێیوایه كه "هه‌سه‌ده ده‌مێنێته‌وه و ده‌بێته به‌شێك له هێزی به‌رگری سوریا".
ده‌شڵێت: "هه‌روه‌ها ئه‌گه‌ری مانەوەی بەڕێوەبەرایەتیی خۆسه‌ر له رۆژئاوای كوردستان له چوارچێوەی دانوستان و كاری لیژنه هاوبه‌شه‌كاندایە".
ئه‌مه‌ش دوای ئه‌وه دێت كه ئه‌مڕۆ دووشه‌ممه 10ی ئاداری 2025 مەزڵوم عەبدی فه‌رمانده‌ی گشتی هێزه‌كانی سوریای دیموكرات "هه‌سه‌ده" و ئه‌حمه‌د شه‌رع سه‌رۆكی سوریا له قۆناغی راگوزه‌ردا له دیمه‌شق رێككه‌وتنێكیان واژۆ كرد كه له 8 خاڵ پێكدێت.
دیارترین خاڵی رێككه‌وتنه‌كه ئه‌وه‌یه كه ئه‌حمه‌د شه‌رع دانی ناوه به‌وه‌ی كورد پێكهاته‌یه‌كی بنه‌ڕه‌تی ده‌وڵه‌تی سوریایه و مافی هاوڵاتیبوون و سه‌رجه‌م مافه ده‌ستووریه‌كانیان ده‌پارێزێت.
هه‌ر به‌گوێره‌ی رێككه‌وتنه‌كه شه‌ڕ له ته‌واوی سوریا راده‌گیرێت و هه‌موو دامه‌زراوه مه‌ده‌نی و سه‌ربازییه‌كانی باكووری رۆژهه‌ڵاتی سوریا له‌گه‌ڵ ئیداره‌ی ده‌وڵه‌تی سوریا یه‌كده‌خرێن به ده‌روازه سنوورییه‌كان و فڕۆكه‌خانه‌كان و كێڵگه‌كانی نه‌وت و غازیشه‌وه.
PM:11:49:10/03/2025
ئه‌م بابه‌ته 616
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت