په‌كه‌كه هه‌ڵوێستی له‌سه‌ر په‌یامه‌كه‌ی ئۆجه‌لان راگه‌یاند
وێستگه‌نیوز-
پارتی كرێكارانی كوردستان رایگه‌یاند كه پێشوازی له په‌یامه‌كه‌ی عه‌بدوڵا ئۆجه‌لان رێبه‌ری زیندانیكراوی ده‌كات و ده‌ڵێت: "هه‌موو داواكارییه‌كانی په‌یامه‌كه جێبه‌جێ ده‌كه‌ین".
ئه‌مڕۆ شه‌ممه، 1ی ئاداری 2025، كۆمیته‌ی رێڤه‌به‌ری په‌كه‌كه راگه‌یه‌ندراوێكی بڵاوكرده‌وه و تیایدا هاتووه كه "بۆ ئه‌وه‌ی بانگه‌وازی ئاشتی و كۆمه‌ڵگه‌ی دیموكراتیی رێبه‌ر ئاپۆ جێبه‌جێ بكرێت، ئێمه له ئه‌مڕۆوه ئاگربه‌ست راده‌گه‌یه‌نین".
كۆمیته‌ی رێڤه‌به‌ری په‌كه‌كه ده‌ڵێت: "تا ئه‌و كاته‌ی هێرش نه‌كرێته سه‌رمان، هیچ هێزێكی ئێمه كرده‌وه‌ی چه‌كداری ئه‌نجام نادات".
جه‌ختیشی له‌وه كردووه‌ته‌وه كه "جێبه‌جێكردنی بابه‌ته‌كانی وه‌ك چه‌ك دانان ته‌نیا به پێشه‌نگایه‌تی پراكتیكی رێبه‌ر ئاپۆ ده‌كرێت و ئاماده‌ی به‌ستنی كۆنگره‌ین، به‌ڵام پێویسته رێبه‌ر ئاپۆ سه‌رۆكایه‌تیی بكات".
ئه‌مه‌ش ده‌قی راگه‌یه‌ندراوه‌كه‌یه:
"ڕاگه‌یاندنی ڕێبه‌ر عه‌بدوڵڵا ئۆجه‌لان له ٢٧ی شوبات به ناونیشانی "بانگه‌وازی ئاشتی و كۆمه‌ڵگه‌ی دیموكراتی"، ڕێگای هه‌موو هێزه‌كانی ئازادی و دیموكراسی ڕووناك ده‌كاته‌وه و وه‌ك مانیفێستۆی سه‌رده‌مه. له‌به‌ر ئه‌وه‌ی مانیفێستۆی كۆمه‌ڵگه‌ی دیموكراتی بۆ گه‌له‌كه‌مان و مرۆڤایه‌تی زیاد كردووه، به ڕێزه‌وه سڵاو له ڕێبه‌ر ئاپۆ ده‌كه‌ین.
جێبه‌جێكردنی ناوه‌ڕۆكه‌كه‌ی به شێوه‌یه‌كی سه‌ركه‌وتوو زۆر گرنگه
له‌گه‌ڵ بانگه‌وازی باسكراودا دیاره كه له كوردستان و ڕۆژهه‌ڵاتی ناوه‌ڕاست پرۆسه‌یه‌كی مێژوویی ده‌ستی پێكردووه. ئه‌مه كاریگه‌ریه‌كی گه‌وره‌ی له‌سه‌ر پێشكه‌وتنی به‌ڕێوه‌به‌رایه‌تی دیموكراتی و ژیانی ئازاد له سه‌رانسه‌ری جیهاندا ده‌بێت. په‌یوه‌ست به‌مه‌وه به‌رپرسیاریه‌تی ده‌كه‌وێته سه‌ر شانی هه‌موومان؛ پێویسته هه‌ر كه‌س ئه‌رك و به‌رپرسیاریه‌تیه‌كانی خۆی جێبه‌جێ بكات.
بێگومان كردنی بانگه‌وازێك به‌م شێوه‌یه زۆر گرنگ بوو؛ ئێستا جێبه‌جێكردنی ناوه‌ڕۆكه‌كه‌ی به شێوه‌یه‌كی سه‌ركه‌وتووانه زۆر گرنگه. ئێمه وه‌ك په‌كه‌كه ڕاسته‌وخۆ به‌شداری ناوه‌ڕۆكی بانگه‌وازی باسكراو ده‌بین و ڕایده‌گه‌یه‌نین كه ئێمه به‌پێی پێداویستیه‌كانی بانگه‌وازه‌كه هه‌ڵسوكه‌وت ده‌كه‌ین و جێبه‌جێیان ده‌كه‌ین. به‌ڵام بۆ سه‌ركه‌وتن پێویسته مه‌رج و پێداویستیه‌كانی سیاسه‌تی دیموكراتی و زه‌مینه‌ی یاسایی دابین بكرێن.
هێزی به‌ڕێوه‌بردنی خه‌بات و هاوئاهه‌نگی په‌كه‌كه كه داڕێژراوه ده‌درێته گه‌ل
زۆر ئاشكرایه كه په‌كه‌كه، بووه‌ته بزووتنه‌وه‌ی ڕاستی و پاڵه‌وانه گه‌وره‌كانی نیو سه‌ده‌ی دوایی كوردستان. هه‌موو شتێك به خه‌باتێكی گه‌وره‌ی پاڵه‌وانه‌تی، فیداكاری، قوربانیدان و ڕه‌نجی زۆر به‌ده‌ست هاتووه. ئێمه هه‌موو شه‌هیده پاڵه‌وانه‌كانی ئه‌م خه‌باتی ئازادییه به ڕێز، خۆشه‌ویستی و سوپاسگوزاریه‌كی گه‌وره به‌بیر دێنینه‌وه. ئێستا ئێمه به هه‌مان گیان و باوه‌ڕ ده‌ستكه‌وته مێژووییه‌كانی باسكراو ده‌گوازینه‌وه بۆ قۆناغێكی نوێی خه‌بات. ژیرییه‌ی كه ڕێبه‌ر ئاپۆ پێشكه‌شی كردووه و ئه‌زموونی گه‌وره‌ی په‌كه‌كه دروستی كردووه، باشی، ڕاستی، جوانی و هێزی به‌ڕێوه‌بردنی خه‌باتی ئازادی له ڕێگه‌ی سیاسه‌تی دیموكراتیه‌وه ده‌داته گه‌له‌كه‌مان.
به ڕاده‌یه‌ك كه هێرش نه‌كرێته سه‌رمان هیچ هێزێكمان چالاكی چه‌كداری ئه‌نجام نادات
له‌م چوارچێوه‌یه‌دا، بۆ ئه‌وه‌ی بانگه‌وازی ڕێبه‌ر ئاپۆ بۆ ئاشتی و كۆمه‌ڵگه‌ی دیموكراتی جێبه‌جێ بكرێت، ئێمه له ئه‌مڕۆوه ئاگربه‌ست ڕاده‌گه‌یه‌نین. به ڕاده‌یه‌ك كه هێرش نه‌كرێته سه‌رمان، هیچ هێزێكمان چالاكی چه‌كداری ئه‌نجام نادات. هه‌روه‌ها جێبه‌جێكردنی بابه‌ته‌كانی وه‌ك چه‌ك دانان ته‌نها به پێشه‌نگایه‌تی پراكتیكی ڕێبه‌ر ئاپۆ ده‌كرێت.
بۆ سه‌ركه‌وتنی كۆنگره پێویسته ڕێبه‌ر ئاپۆ خۆی به‌ڕێوه‌ی ببات
هه‌روه‌ها ئێمه ئاماده‌ین كه به‌پێی داواكاری ڕێبه‌ر ئاپۆ كۆنگره‌ی پارتی به‌ڕێوه ببه‌ین. به‌ڵام بۆ جێبه‌جێكردنی ئه‌مه پێویسته مه‌رج و پێداویستیه گونجاوه‌كان دابین بكرێن و بۆ سه‌ركه‌وتنی كۆنگره‌ش پێویسته ڕێبه‌ر ئاپۆ خۆی پێشه‌نگایه‌تی كۆنگره بكات و به‌ڕێوه‌ی ببات. تا ئێستا له‌گه‌ڵ هه‌موو هه‌ڵه و كه‌موكوڕیه‌كان ئێمه به‌ڕێوه‌به‌رایه‌تی شه‌ڕمان كرد؛ به‌ڵام ته‌نها ڕێبه‌ر ئاپۆ ده‌توانێت به‌ڕێوه‌به‌رایه‌تی سه‌رده‌می ئاشتی و كۆمه‌ڵگه‌ی دیموكراتی بكات.
پێویسته مه‌رج و پێداویستیه‌كانی ئازادی جه‌سته‌یی، ژیان و كاركردنی ئازاد دابین بكرێن
ڕاستیه به‌رچاوه‌كان زۆر ئاشكرا نیشان ده‌ده‌ن كه بۆ ئه‌وه‌ی بانگه‌وازی ئاشتی و كۆمه‌ڵگه‌ی دیموكراتی به شێوه‌یه‌كی سه‌ركه‌وتووانه جێبه‌جێ ببێت، بۆ دیموكراتیكردنی توركیا و ڕۆژهه‌ڵاتی ناوه‌ڕاست له‌سه‌ر بنه‌مای چاره‌سه‌ری دیموكراتی كێشه‌ی كورد، بۆ پێشخستنی بزووتنه‌وه‌ی دیموكراسی گڵۆباڵ، پێویسته مه‌رجه‌كانی ڕێبه‌ر عه‌بدوڵڵا ئۆجه‌لان بۆ ئه‌وه‌ی بتوانێت به شێوه‌یه‌كی جه‌سته‌یی ئازاد بژیت و كار بكات دابین بكرێن، هاوڕێكانیشی له‌ناویاندا بتوانن به‌بێ به‌ربه‌ست له‌گه‌ڵ ئه‌و كه‌سانه‌ی ده‌یانه‌وێت په‌یوه‌ندی دروست بكه‌ن. ئێمه هیوادارین كه پێداویستیه‌كانی ئه‌مه له‌لایه‌ن دامه‌زراوه په‌یوه‌ندیداره‌كانی ده‌وڵه‌ته‌وه جێبه‌جێ بكرێن.
بانگه‌واز كۆتایی نییه ده‌ستپێكێكی نوێیه
گه‌ل و دۆسته به‌ڕێزه‌كانمان!
بانگه‌وازی ڕێبه‌ر ئاپۆ بێگومان كۆتایی نییه، به پێچه‌وانه‌وه ده‌ستپێكێكی نوێیه. وه‌ك كه له ڕاگه‌یاندنه‌كه‌دا زۆر سه‌رنجڕاكێش ده‌وترێت و به شێوه‌یه‌كی ئاشكرا ده‌خاته به‌رچاو كه ئه‌و شتانه‌ی كه پێویست بوو له ٣٥ ساڵی ڕابردوودا به‌تایبه‌تی له‌م ٢٠ ساڵه‌ی دواییدا بكرابان، به‌ڵام به‌و ڕاده‌یه‌ی ده‌خوازرێت له كاتی خۆیاندا نه‌كراون، ئێستا پێویسته بێگومان بكرێن. له‌م بواره‌دا پێویسته بانگه‌وازی ڕێبه‌رایه‌تی، هۆكاره‌كانی، تایبه‌تمه‌ندی و ئه‌ركه‌كانی پرۆسه نوێیه‌كه كه ده‌ستی پێكردووه به دروستی و ته‌واوی تێبگه‌ین و پێویسته پێداویستیه‌كانی به سه‌ركه‌وتوویی جێبه‌جێ بكه‌ین. پێویسته به به‌رپرسیاریه‌تی و جیددیه‌تێكی گه‌وره‌وه نزیك له ناوه‌ڕۆكی بانگه‌وازه‌كه ببینه‌وه و زۆر گرنگه كه له هه‌موو بوارێكدا به شێوه‌یه‌كی سه‌ركه‌وتووانه جێبه‌جێ بكرێت.
پێویسته هه‌موومان بۆ سه‌ركه‌وتنی بانگه‌وازی ڕێبه‌رایه‌تی خۆمان به به‌رپرس بزانین
با له‌بیرمان نه‌چێت كه بارگرانیه‌كه‌ی هه‌ره زۆر ڕێبه‌ر ئاپۆ هه‌میشه خستوویه‌تیه سه‌ر شانی خۆی، ڕێگامان ڕووناك ده‌كاته‌وه و پێشه‌نگایه‌تیمان ده‌كات. ئێستا به 'بانگه‌وازی ئاشتی و كۆمه‌ڵگه‌ی دیموكراتی' هه‌نگاوێكی نوێ ده‌نێت و بۆ هه‌موو ژێرده‌سته‌كان به‌تایبه‌تی ژنان و لاوان پرۆسه‌یه‌كی نوێی خه‌بات ده‌ست پێده‌كات. له‌به‌ر ئه‌مه با تایبه‌تمه‌ندیه‌كانی ئه‌م پرۆسه نوێیه به دروستی تێبگه‌ین و له‌سه‌ر بنه‌مای ئه‌وه‌ی كه هه‌رده‌م له به‌رامبه‌ر هه‌ر جۆره ساخته‌كاری و هێرشێك ئاماده بین، ئه‌ركه‌كانی به سه‌ركه‌وتوویی جێبه‌جێ بكه‌ین. با ڕێكخستنبوونی دیموكراتی و خه‌باتی ئازادیمان له هه‌موو بوارێكدا به ئازایه‌تی و فیداكاریه‌كی گه‌وره‌وه له كوردستان، ڕۆژهه‌ڵاتی ناوه‌ڕاست و له چوار لای جیهان گه‌ش بكه‌ین. پێویسته هه‌موومان بۆ سه‌ركه‌وتنی بانگه‌وازی ڕێبه‌رایه‌تی خۆمان به به‌رپرس بزانین.
بانگه‌وازی به‌هێزتر پشتگیری له ٨ی مارس و نه‌ورۆز بكه‌ن
ئه‌وه‌تا، چووینه مانگی مارسێكی نوێوه و هه‌یه‌جانی ٨ی مارس و نه‌ورۆز ده‌ژین. ئێمه شۆڕشی ئازادی ژنان له‌سه‌ر بنه‌مای ژنناسی پێش ده‌خه‌ین و له‌سه‌ر هێڵی شارستانیه‌تی دیموكراتی ژیانی كۆمه‌ڵگای ئه‌خلاقی و سیاسی ڕێكده‌خه‌ین. هه‌وڵ ده‌ده‌ین ڕاستی ئاپۆیی به شێوه‌یه‌كی دروست و ته‌واو تێبگه‌ین و شۆڕشی ڕاستی كه شۆڕشی بیركردنه‌وه و شێوازی ژیانه پێشبخه‌ین. بانگه‌وازی دوایی ڕێبه‌ر ئاپۆ له ڕاستیدا بانگه‌وازی به‌هێزتر پشتگیری له ٨ی مارس و نه‌ورۆز بكه‌ن و به هه‌یه‌جانێكی گه‌وره‌وه پیرۆزی بكه‌ن. له هه‌ر كه‌سێك زیاتر پێویسته ژنان و لاوان ئه‌م بانگه‌وازه به دروستی تێبگه‌ن، به به‌هێزی پشتگیری لێبكه‌ن و پێداویستیه‌كانی جێبه‌جێ بكه‌ن.
له‌سه‌ر ئه‌م بنه‌مایانه ئێمه ٨ی مارس ڕۆژی ژنانی كرێكار و نه‌ورۆز له هه‌موو ژنان و لاوان، گه‌له‌كه‌مان و دۆسته‌كانمان پیرۆز ده‌كه‌ین و بانگه‌واز له هه‌ر كه‌سێك ده‌كه‌ین كه به گیانی ٨ی مارس و نه‌ورۆز پشتگیری له بانگه‌وازی ڕێبه‌رایه‌تی بكه‌ن و له هه‌موو بوارێكدا خه‌باتی ئازادی گه‌ش بكه‌ن!
بژی پێشه‌نگی پاڵه‌وانی گه‌له‌كه‌مان په‌كه‌كه!
"بژی ڕێبه‌ر ئاپۆ!"
AM:08:33:01/03/2025
ئه‌م بابه‌ته 5776
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت