ئۆجەلان: هەرکات داوای هەڵوەشاندنەوەی پەکەکەم کرد ئەوە من نیم
وێستگەنیوز_
عەبدوڵڵا ئۆجەلان، رێبەری زیندانیکراوی پارتی کرێکارانی کوردستان (پەکەکە)، لە دوایین پەیامیدا داوای چەکدانان لە گەریلا و هەڵوەشاندنەوەی پەکەکە دەکات، بەپێی بەدواداچونێکی وێستگەنیوز، ئۆجەلان لەناو یەکێک لە کتێبەکانیدا و لە گفتوگۆی لەگەڵ چەند هاوڕێیەکیدا زیاتر لە جارێک وتویەتی، "هەر کات داوای هەڵوەشاندنەوەی پەکەکەم کرد، ئەوە من نیم."
عەبدوڵڵا ئۆجەلان ڕێبەری پەکەکە، کە ماوەی 26 ساڵە لە دورگەی ئیمراڵی زیندانیکراوە، لە بەرگی پێنجەمی کتێبی 'عەشقی کورد'، هەڵوێستی خۆی لەسەر هەڵوەشاندنەوەی پەکەکە خستووەتەڕوو؛ هاوکات چەند جارێک ڕەتیکردوەتەوە، لە هیچ بارودۆخێکدا پەکەکە هەڵبوەشێنێتەوە.
ئۆجەلان لە کتێبی عەشقی کورد نوسیویەتی،" ئەگەر ڕۆژێک لە ڕۆژان لە هەر جۆرە بارودۆخێکدا من ببمە هۆکاری هەڵوەشاندنەوەی ئەو جوڵانەوە ئازادیخوازەی کە خۆم داممەزراندووە و ساڵەهای ساڵە خەباتی بۆ دەکەم و قوربانیی زۆرمان بۆ داوە، ئەوا بێگومان ئەوە من نیم".
سەبارەت بە ئامانجی دامەزراندنی پەکەکە ئۆجەلان باسی لەوەکردووە، "ئامانج لە دامەزراندنی ئەو جوڵانەوەیە چارەسەری ڕیشەیی دۆزی ڕەوای گەلێکە نەک بۆ بەرژەوەندیی دەسەڵاتێکی پاوانخواز".
وێستگەنیوز قسەی لەگەڵ یەکێک لە هاوڕێکانی عەبدوڵڵا ئۆجەلان کردووە کە لە چەند سەردەمێکی جیاوازدا پێکەوە بوون و گێڕایەوە کە، "ئۆجەلان لە چەندین بۆنەی جیاوازدا بە تایبەت لە کاتی پێشكەشکردنی پەروەردەی سیاسی بە کادران، چەندین جار جەختی لەسەر ئەوە کردووەتەوە کە "بەهیچ جۆرێک پەکەکە هەڵناوەشنێتەوە و ئەو کارێکی لەو شێوەیە ناکات".
ئێستا دوای 41 ساڵ لە خەباتی چەکداریی، ڕێبەری زیندانیکراوی پەکەکە لە دوایین پەیامیدا کە لە ڕێگەی شاندی ئیمراڵییەوە بۆ ڕای گشتی بڵاوکرایەوە، "داوای لە پەکەکە کردووە چەک دابنێت و خۆی هەڵبوەشێنێتەوە."
شاندەکە دەڵێن، ئۆجەلان لە پەیامەکەیدا جەختی کردووەتەوە، "بەرپرسیارییەتیی مێژوویی ئەو بانگەوازەش بۆ چەک دانان و هەڵوەشاندنەوەی پەکەکە لە ئەستۆ دەگرێت."
ئۆجەلان هۆکاری داواکارییەکەی بۆ "ئاوێتەبوون لەگەڵ دەوڵەت و کۆمەڵگە" گەڕاندووەتەوە و باسی لەوەکردوە، "وەکو هەموو کۆمەڵە و پارتییەکی هاوچەرخ کە بەزۆر کۆتایی بە بوونی نەهێنراوە. خۆویستانە ئەو کارە دەکات، ئێوەش کۆنگرەی خۆتان کۆبکەنەوە و بڕیار بدەن".
وێستگەنیوز بەدواداچونی بۆ پەیامەکەی ئۆجەلان کردووە، ئەو شاندەی کە چوونەتە ئیمراڵی پشتراستیان کردووتەوە کە پەیامەکە "هی خودی ئۆجەلانە و خۆی پەیامەکەی لەگەڵ شاندەکە و بەرپرسانی پەکەکە تاوتوێ کردووە."
دامەزراندنی پەكەكە و تێڕوانینی ئێستای ئۆجەلان
پارتی كرێكارانی كوردستان لە ساڵی 1978 لەلایەن عەبدوڵڵا ئۆجەلانەوە دامەزرا. كۆنگرەی دامەزراندنەكەی بە بەشداریی 23 ئەندام بووە.
پەكەكە لەو بەروارەوە لەسەر بنەما شۆڕشگێڕییەكانی ماركسیزم – لینینیزم و نەتەوەخوازیی كوردی درێژەی بە كاری سیاسی داوە تا لە 15ی ئابی 1984 خەباتی چەكداریشی خستەپاڵ.
ئامانجی پەكەكە دروستكردنی دەوڵەتێكی سەربەخۆی كوردیی سۆشیالیستی بوو لە كوردستان، ئەو ناوچەیەی كەوتۆتە باشوری ڕۆژھەڵاتی توركیا، باكووری ڕۆژھەڵاتی عێراق، باكووری ڕۆژھەڵاتی سووریا و باكوری ڕۆژئاوای ئێران، كە تیایدا كورد ڕێژەی سەرەكی دانیشتوان پێكدەھێنن. ئەم ئامانجە ئێستا نوێكراوەتەوە بەوەی داوای مافی كلتووری و سیاسی بۆ كوردەكانی ناو دەوڵەتی توركیا دەكەن.
ڕێبەری زیندانیکراوی پەکەکە لە دوایین پەیامیدا، دیموکراسی وەک ئامانجی پەکەکە و تاکە ڕێگەی چارەسەر دیارییکردووە و ڕایگەیاندووە، "تەنیا لە رێگەی کۆمەڵگەیەکی دیموکرات و هەبوونی بواری کاری سیاسییەوە دەتوانرێت ئەو پێکهاتە سیاسی و کۆمەڵایەتی و ئابوورییانە بهێنرێنە کایەوە بۆ هەموو لایەن و پێکهاتەکان کە تێیدا رێز لە ناسنامەکان بگیرێت، ئازادیی رادەربڕین و رێکخستنی دیموکراتیک فەراهەم بکرێت".
ئۆجەلان باسی لەوەکردووە،" پەکەکە لە هەلومەرجێکی ئاوادا لە دایکبووە، کە هەموو ئازادییەکان قەدەخەکرابوون.لە رووی تیۆری، پەیڕەو و پرۆگرام، ستراتیژ و تەکنیکەوە، لەژێر کاریگەریی قورسی سیستمی سۆسیالیستی واقیعیی سەدەکەدا بووە".
ئۆجەلان پەکەکەی وەک تەمەن درێژترین و فراوانترین بزووتنەوەی سەرهەڵدان و تووندوتیژیی مێژووی کۆماری تورکیا ناوبردووە و وتوویەتی، "بەهۆی داخرانی دەرگاکانی سیاسەتی دیموکراتیک، هێز و بنچینەی پەیدا کردووە."
پرۆسەی ئاشتی ڕابردوو شکستی هێنا
ساڵی 2012 پڕۆسەی ئاشتی لەنێوان پەكەكە و توركیا ھاتە ئاراوە، شاندێك لە پەرلەمانتارانی ھەدەپە بۆ گفتوگۆی نێوان توركیا و پەكەكە پێكهات، لە ئیمراڵی سەردانی عەبدوڵڵا ئۆجەلان'ـیان دەكرد، چەند جارێكیش ئەو شاندە نامەی ئۆجەلانیان بۆ سەركردەكانی پەكەكە گەیاندە قەندیل.
ئامانجی پەكەكە گوێگرتن بوو لە پەیام و خواستی كورد و هێنانەدی مافەكانی، بەڵام توركیا ویستێكی دیكە هەبوو، بۆیە دوای ھەڵبژاردنەكانی 7ـی حوزەیرانی 2015، جارێكی دیكە ئاڵۆزیی لەنێوان ئاكەپە و ھەدەپە و پەكەكە سەریھەڵدایەوە، لەو سەروبەندەدا و لە ساڵی 2015 تەقینەوەیەك لە ناوچەی (پرسوس) سروچی سەر بە شاری ڕحای باكووری كوردستان ڕوویدا و توركیا پەكەكەی بە بكەری تەقینەوەكە لەقەڵەمدا، دوای ئەوە سوپای توركیا ئۆپەراسیۆنێكی بەرفراوانی بۆ سەر بارەگاكانی پەكەكە لە ناوچە سنورییەكانی نێوان باكور و باشوری كوردستان و بناری قەندیل ئەنجامدا.
سەرنەكەوتنی هەوڵەكانی توركیا
بەدرێژایی چەندین دەیەی ڕابردوو توركیا هەموو توانا سەربازییەكانی خۆی لە هێزی زەمینی و ئاسمانی لە دژی پەكەكە خستووەتەگەڕ. لەم چەند ساڵەی ڕابردووشدا زۆرترین فشاری بۆ سەر پەكەكە دروستكردووە، بەهۆیەوە دەیان كیلۆمەتر خاكی هەرێمی كوردستانی بۆ شەڕی گەریلاكان بەزاندووە. هەر لەم ماوەیەشدا چەندین سەركردەی دیار و دەیان گەریلای پەكەكەی بە هێرشی ئاسمانی كردووەتە ئامانج.
پەكەكە سوورە لەسەر ئەوەی، "ئەوەی بە بەردەوامی تێكشكاوە كۆماری توركیا بووە، ئەوەشی هەموو كاتێك سەركەوت و بەهێز بووە، بزوتنەوەی ئازادییە".
PM:03:49:28/02/2025
ئه‌م بابه‌ته 8992
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت