دادگای فیدراڵی: بڕیاری راگرتنی یاسای گەڕاندنەوەی موڵک بۆ خاوەنەکەی و دوو یاساکەی دیکە هەڵوەشایەوە

جاسم محەممەد عەبوود، سەرۆکی دادگای باڵای فیدراڵیى عێراق، بڕیاری دادگای لەبارەی تانەکانی سەر هەرسێ یاسای لێبوردنی گشتیی و باری کەسی و گەڕانەوەی موڵک و ماڵ بۆ خاوەنەکانیان خوێندنەوە و رایگەیاند، "دادگای باڵای فیدراڵی بڕیاری دا بە رەتکردنەوەی سکاڵاکان بە ژمارەکانی 17 و 18 و 19 و 21 و  23 ی فیدراڵی ساڵی 2025، بەهۆی ئەوەی مەرجی بەرژەوەندی تێدانەبوو. هەروەها فەرمانسالارییەکەشی هەڵوەشاندەوە کە لەلایەن ئەم دادگایە بە ژمارە 3 لە 04-02- 2025دەرچوو بوو، بڕیارەکەش بە زۆرینە لە 11-02-2025 دا دەرچوو".

 

سکاڵاکاران 18 پەرلەمانتاری شیعە و پەرلەمانتارێکی کوردی ئێزدیی ئەنجوومەنی نوێنەرانی عێراق بوون. 

 

ئەمە لە کاتێکدایە، پێشتر و لە رۆژی 4ـی 2ـی 2025، دادگای باڵای فیدراڵی فەرمانی راگرتنی جێبەجێکردنی هەرسێ یاسای باری کەسی، لێبووردنی گشتی و گەڕانەوەی زەوی و زار بۆ خاوەنی رەسەنیان دەرکرد، تاوەکو ئەو کاتەى سکاڵا تۆمارکراوەکان لەسەریان یەکلایی دەبنەوە. 

 

رۆژێک دواتر، ئەنجوومەنى باڵاى دادوەریی عێراق کۆبووەوە و دژى بڕیارەکەی دادگای باڵای فیدراڵی وەستایەوە و بە "نایاسایی" وەسفیکرد. 

 

هەرسێ یاساکە لە دانیشتنی رۆژی 21ـی کانوونی دووەمی 2025 لە پەرلەمانی عێراق بەیەک پاکێج پەسەندکران. 

 

راگرتنی جێبەجێکردنی یاسای لێبووردنی گشتی، نیگەرانی و ناڕەزایی سوننەکانی لێکەوتەوە، چونکە لێبووردنی گشتیی یەکێک لە داواکارییە سەرەکییەکانی سوننەکانە.