بڕیاری قەدەغەی هاوردەکردنی تەماتە نرخەکەی بەرزدەکاتەوە؟
وێستگەنیوز- سازگار ئەحمەد
وەزارەتی کشتوکاڵی هەرێمی کوردستان بڕیاریدا لە رۆژی یەکشەممەوە، هاوردەکردنی تەماتە لە ئێرانەوە بۆ هەرێم قەدەغە بکرێت و نوێنەری کاسبکارانی عەلوەی سلێمانی رایدەگەیەنێت، ئەم بڕیارە بەشێوەیەکی کەم کاریگەریی دروست دەکات لەسەر نرخی تەماتە.
ئەمڕۆ پێنجشەممە 23ی کانونی دووەمی 2025، بێگەرد تاڵەبانی، وەزیری کشتوکاڵ و سەرچاوەکانی ئاوی هەرێمی کوردستان، دوای کۆبوونەوەیەک لەگەڵ جوتیارانی بەسرە و پێنجوێن لە کۆنگرەیەکی رۆژنامەوانیدا رایگەیاند، "لەپێناو بەرژەوەندی جوتیاران بڕیارماندا بە راگرتنی هاوردەکردنی تەماتە بۆ ناوخۆی هەرێمی کوردستان و بڕیارەکە لە رۆژی یەکشەممە 26.1.2025ـەوە دەکەوێتە بواری جێبەجێکردنەوە و تاوەکو کاتێکی نادیار بەردەوام دەبێت".
عەتا محەمەد، نوێنەری کاسبکارانی عەلوەی سلێمانی بە وێستگەنیوزی راگەیاند، "بڕیاری قەدەغەی هاوردەکردنی تەماتە کاریگەریی دەبێت لەسەر نرخی تەماتە، بەڵام بە رێژەیەکی کەم نرخەکەی بەرزدەبێتەوە".
ئاماژەی بەوەشکرد، "لەئێستادا نرخی تەماتە لە بازاڕەکاندا ناچێتە سەروو یەک هەزار دینار، بەڵام پێدەچێت لە مانگی رەمەزاندا نرخی تەماتە لە بازاڕەکانی هەرێم زیاتر بەرزبێتەوە".
PM:07:19:23/01/2025
ئه‌م بابه‌ته 1812
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت