سه‌رۆكی حكومه‌تی هه‌رێم له‌گه‌ڵ سكرتێری گشتیی نه‌ته‌وه یه‌كگرتووه‌كان كۆبووه‌وه
وێستگه‌نیوز-
سه‌رۆكی حكومه‌تی هه‌رێمی كوردستان و سكرتێری گشتی نه‌ته‌وه یه‌كگرتووه‌كان كێشه‌كانی نێوان به‌غدا و هه‌ولێریان تاووتوێكرد.
به‌گوێره‌ی راگه‌یه‌ندراوێكی نووسینگه‌كه‌ی، ئه‌مڕۆ چوارشه‌ممه 1/22 مه‌سرور بارزانی سه‌رۆكی حكومه‌تی هه‌رێمی كوردستان، له داڤۆس، له‌گه‌ڵ سكرتێری گشتیی نه‌ته‌وه یه‌كگرتووه‌كان ئه‌نتۆنیۆ گۆتێرێس كۆبووه‌وه .
له راگه‌یه‌ندراوه‌كه‌دا هاتووه كه له كۆبوونه‌وه‌كه‌دا "دۆخی گشتیی عێراق و كێشه‌كانی نێوان حكومه‌تی فیدراڵ و هه‌رێمی كوردستان تاووتوێكرا و جه‌خت له ڕێزگرتن له مافه ده‌ستووری و شایسته داراییه‌كانی هه‌رێمی كوردستان كرایه‌وه".
لای خۆیه‌وه مه‌سرور بارزانی ستایشی هه‌وڵه‌كانی د. محه‌مه‌د ئه‌لحه‌سسان، نوێنه‌ری تایبه‌تی سكرتێری گشتیی UN و به‌رپرسی (یوونامی) له عێراق كرد به ئاراسته‌ی چاره‌سه‌ركردنی كێشه‌كانی هه‌ولێر و به‌غدا و پاراستنی ئاشتی و سه‌قامگیریی عێراق.
راشگه‌یه‌ندراوه كه گۆڕانكارییه‌كانی ڕۆژهه‌ڵاتی ناوه‌ڕاست و ئاگربه‌ستی غه‌ززه و به تایبه‌تی دۆخی سوریا، ته‌وه‌رێكی دیكه‌ی كۆبوونه‌وه بوو. هه‌ردوولا هاوڕابوون له سه‌ر گرنگیی به‌رده‌وامبوونی ئاگربه‌ست له كه‌رتی غه‌ززه و پشتیوانیكردنی كۆمه‌ڵگه‌ی نێوده‌وڵه‌تی له‌پێناو پاراستنی ئاشتی و ئارامیی له سوریا.
PM:08:57:22/01/2025
ئه‌م بابه‌ته 1188
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت