ئه‌ردۆغان: به‌مزووانه هه‌نگاوی ریشه‌یی بۆ نه‌هێشتنی یه‌كینه كوردییه‌كان له سوریا ده‌گرینه‌به‌ر
وێستگه‌نیوز-
جارێكی تر سه‌رۆك كۆماری توركیا هه‌ڕه‌شه له كوردانی رۆژئاوای كوردستان ده‌كات و رایگه‌یاند كه "به‌مزووانه هه‌نگاوی ریشه‌یی بۆ نه‌هێشتنی (یه‌كینه‌كانی پاراستنی گه‌ل)ی كورده‌كان كه سه‌ركردایه‌تی هێزه‌كانی سوریای دیموكرات (هه‌سه‌ده) ده‌كات، ده‌گرنه‌به‌ر".
له كاتێكدا سوپای توركیا و گرووپه چه‌كداره سورییه‌كانی هێرشه‌كانیان بۆسه‌ر میحوه‌ره‌كانی هه‌سه‌ده له باكوور و رۆژئاوای سوریا زیاتر كردووه و رووبه‌ڕووبوونه‌وه له ده‌وروبه‌ری به‌نداوی تشرین به‌رده‌وامه، ره‌جه‌ب ته‌یب ئه‌ردۆغان سه‌رۆكی توركیا جه‌ختی له‌وه كرده‌وه كه بچووكترین لێبوورده‌ییان نابێت به‌رامبه‌ر (یه‌كینه‌كانی پاراستنی گه‌ل)ی كورده‌كان و ئاماژه‌ی به‌وه‌دا كه یه‌ك له‌سه‌ر سێی خاكی سوریایان داگیر كردووه.
ئه‌ردۆغان وتی: "توركیا به‌رده‌وام ده‌بێت له پێشكه‌شكردنی هاریكاری پێویست بۆ گه‌لی سوریا و ئامانجی پاكتاوكردنی سه‌رجه‌م رێكخراوه تیرۆریسییه‌كانه له سوریا".
سه‌رۆك كۆماری توركیا له هه‌شته‌مین كۆنگره‌ی پارته‌كه‌یدا "پارتی داد و گه‌شه‌پێدانی فه‌رمانڕه‌وا" له شاری ئادانا باسی له‌وه كرد كه "توركیا له سوریا و ناوچه‌كانی تری جیهان ئاماده‌یه و له نزیكه‌وه به‌دواداچوون بۆ پێشهاته‌كان ده‌كات، له‌سه‌ر بنه‌مای دیدگایه‌كی ستراتیژی كه هه‌وڵی گه‌یشتن به به‌رژه‌وه‌ندییه‌كانی ده‌دات".
وتیشی: "ئامانجمان ده‌سته‌به‌ركردنی ئاسایشی خۆمان و لابردنی ئاسته‌نگه‌كانی به‌رده‌م یه‌كپارچه‌یی خاكی سوریای دراوسێمان و یه‌كگرتوویی سیاسی و ئاشتی ناوخۆییه و تا تیرۆریسته جوداخوازه‌كان كه چه‌كیان هه‌ڵگرتووه له سوریا هه‌بن، هه‌ست به ئارامی ناكه‌ین".
راشیگه‌یاند كه "یه‌كینه‌كانی پاراستنی گه‌لی كورد (یه‌په‌گه) كه سێیه‌كی خاكی سوریایان داگیركردووه و به‌شێكی زۆری سامانه سروشتییه‌كانی تاڵان ده‌كه‌ن، گه‌وره‌ترین به‌ربه‌ستن له‌به‌رده‌م ئاسایش و ئارامی له‌م وڵاته‌دا و له‌گه‌ڵ گۆڕانی كه‌شوهه‌وای نێوده‌وڵه‌تی، ئه‌و سیناریۆیانه‌ی كه له ناوچه‌كه‌دا له‌لایه‌ن ئه‌م رێكخراوه تیرۆریستییه‌وه دانراون... ئیتر كاریگه‌ر نیین".
AM:09:10:19/01/2025
ئه‌م بابه‌ته 1036
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت