مه‌زڵوم عه‌بدی په‌یامێكی ده‌رباره‌ی كۆبوونه‌وه‌كه‌ی له‌گه‌ڵ مه‌سعود بارزانی راگه‌یاند
وێستگه‌نیوز-
فه‌رمانده‌ی گشتیی هێزه‌كانی سوریای دیموكرات (هه‌سه‌ده) ناوه‌ڕۆكی كۆبوونه‌وه‌كه‌ی له‌گه‌ڵ سه‌رۆكی پارتی دیموكراتی كوردستان راگه‌یاند و ده‌ڵێت: "جه‌ختمان كرده‌وه كه پێویسته هه‌ڵوێستی كوردان له سوریا یه‌ك بێت".
دوێنێ پێنجشه‌ممه، مه‌سعود بارزانی سه‌رۆكی پارتی دیموكراتی كوردستان له پیرمام، پێشوازی له مه‌زڵوم عه‌بدی مانده‌ی گشتیی هێزه‌كانی سوریای دیموكرات (هه‌سه‌ده) و شاندی یاوه‌ری كرد.
ئه‌مڕۆ هه‌ینی مه‌زڵوم عه‌بدی له پلاتفۆرمی (X) له په‌یامێكدا ناوه‌ڕۆكی كۆبوونه‌وه‌كه‌ی ئاشكرا كرد و رایگه‌یاند كه "كۆبوونه‌وه‌مان له‌گه‌ڵ سه‌رۆك مه‌سعود بارزانی جێگای دڵخۆشی بوو".
مه‌زڵوم عه‌بدی ده‌ڵێت: "باسی ئه‌و گۆڕانكارییانه‌مان كرد كه سوریا پێیدا تێده‌په‌ڕێت و پێكه‌وه جه‌ختمان له‌وه كرده‌وه كه پێویسته هه‌ڵوێستی كوردان له سوریا یه‌ك بێت".
وتیشی: "ده‌بێت دیالۆگ له‌گه‌ڵ دیمه‌شق به شێوه‌یه‌كی ئاشتیانه مافی گه‌لی كورد بپارێزێت".
فه‌رمانده‌ی گشتی هه‌سه‌ده راشیگه‌یاند كه له‌گه‌ڵ سه‌رۆكی پارتی جه‌ختیان له‌وه كرده‌وه كه "گرنگیی یه‌كێتیی كوردی و ئارامیی ناوچه‌كه به‌گشتی به‌رپرسیارێتیی هه‌موومانه و ئێمه پێكه‌وه هاوكار ده‌بین".
ڕۆژی 16ـی کانونی دووەمی 2025 مەزڵوم عەبدی فەرماندەی گشتیی هێزەکانی سووریای دیموکرات بە بانگهێشتی فەرمی گەیشتە هەولێر و لەگەڵ مەسعود بارزانی سەرۆکی پارتی دیموکراتی کوردستان و سەرۆکی پێشووی هەرێمی کوردستان کۆبوەوە و بە تەلەفۆنیش قسەی لەگەڵ نێچیرڤان بارزانی سەرۆکی هەرێمی کوردستان کرد.
بەپێی راگەیەندراوی بارەگای بارزانی ، لەم دیدارەدا بارودۆخی سوریا و دوا پێشهاتە ئەمنی و سیاسییەکانی سوریا، هەروەها چوارچێوەی گشتیی مامەڵەکردنی لایەنە کوردییەکان لەگەڵ بارودۆخی تازەی سووریا و چۆنیەتیی گرتنەبەری هەڵوێستێکی هاوبەشی لایەنە کوردییەکانی سوریا تاوتوێ کرا.
هەر لەم دیدارەدا جەخت لەوە کراتەوە، پێویستە لایەنە کوردیەکانی سووریا بەبێ دەستوەردانی هیچ لایەنەک و بە ڕێکاری ئاشتیانە بڕیار لە چارەنووسی خۆیان بدەن و لەپێناو زامنکردنی مافەکانیان بە یەکڕێزی و یەکهەڵوێستیی هاوبەش لەگەڵ حکومڕانانی تازەی سووریا بگەنە لێک تێگەیشتن و ڕێککەوتن و فاکتەری ئاشتی و سەقامگیری بن و ڕێگری بکەن لە دووبارەبوونەوەی ئەو نەهامەتیانەی بەسەر گەلی کورد و پێکهاتەکانی تری سوریادا هاتوون.
PM:03:41:17/01/2025
ئه‌م بابه‌ته 5228
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت